Aşıq Şəmşirlə deyişmə – II
Şəmşir
Şair Vəli, küsmə, incimə məndən
Dostun, qohumların üzünə gəl bax.
Əzəl iltimasım bil budu sənə,
Bizim İstisuyun gözünə gəl bax.
Vəli
Aşıq Şəmşir könlüm almaq istəsən,
Bir qədəm qoy bu diyara, əzizim,
Dərman eylə qeydə qalmaq istəsən,
Sağalsın qəlbindən yara, əzizim.
Şəmşir
Vurular qəlbiniz bu çəmənliyə
Ətirli, qönçəli yasəmənliyə,
Qayada qartala, daşda kəkliyə,
Gölün sonasına, qazına gəl bax.
Vəli
Dost gərək dostunun qeydinə qala
Qəlbinə dəyibsə, könlünü ala.
Qiymət ver insana, elmə, kamala,
İşıq salır o rüzgara, əzizim.
Şəmşir
Var hələ Ketinin döşündə ağ qar,
Yay gələn qonağa saxlanır bu qar,
Bir yanında allı-güllü çəmənzar
Taxta yaylağının düzünə gəl bax.
Vəli
Biz həsrət deyilik gülə-çiçəyə
Havaya, həyata, yemək-içməyə,
Almağa, verməyə, görüb bilməyə
Seyr etməyə çəmənzara, əzizim.
Şəmşir
Ağdaban elinə düşsə güzarın
Artar məhəbbətin, olar vüqarın,
Yolunu gözləyir öz qohumların
Onların ərkinə, nazına gəl bax.
Vəli
Mən ki varam yaxşıların yarıyam,
Səadət bağında qəm xirdarıyam,
Dostun, qohumların intizarıyam
Gəl, gedim açılsın ara, əzizim.
Şəmşir
Xəbər gətir Abbasqulu qocadan
Çağır Miskin Rüstəmlini ucadan,
Bir günəş ol, sal ziyanı bacadan
Nə olar, Şəmşirin sözünə gəl bax.
Vəli
Miskinli Vəlinin düz ilqarından
Günəş ol, çəkinmə dağlar qarından,
Sazından, sözündən, xoş baharından,
Min ilham ver insanlara, əzizim.
Kitabxana.az · https://kitabxana.az/en/works/miskin-veli-asiq-semsirle-deyisme-ii
Use ← → keys to move, R for a random poem
More by this author
Poems by other poets
فساد از دل فروشوئی، غبار از جان برافشانی
Keçər gedərDünya işində hər nə dutarsan keçər gedər,Hər nik ü bəd içində qılarsan keçər gedər.
EllərəMüshəf açdım, əlif gəldi falımız,Dal oldu gedəlim bizim ellərə,
Məndən — səndənNazlı dilbər, nə yaraşır qəddinə,Tirmə məndən, kəmər məndən, bel səndən,