Cavanşirin sarayı

Söhrab

Hökmdar...

Cavanşir

Mən öz qərarımı bildirirəm. Sasani qoşunlarının sərkərdəsi Bəhrama rədd cavabı verilsin...

Qartal

Namərdlərə bundan gözəl cavab ola bilməz.

Cavanşir

Dost kimi gələn elçilərə isə yalnız bir cavabım var. Dostluq arzusunda olan hər kəs mənim sədaqətimə əmin ola bilər.

Saran

Böyük hökmdar düşmən də olsa, siz öz nəzakətinizi Bəhramdan əsirgəməyin...

Cavanşir

Fikrini açıq söylə, Saran...

Saran

Sənin qərarın mənə bəllidir, böyük hökmdar. Bu dünya görmüş qocanın məsləhətini dinləmək istəyirsənsə, Kayan elçisini hörmətlə yola sal...

Cavanşir

Mənim iradəmlə oynayanlar məndən aman gözləməsinlər.

Zibeydə xatun gəlir.

Zibeydə

Bəhram səninlə görüşməmiş qayıdır... Cavanşir, adına-sanına ləkə vurma... Qoy düşmən belə, sənin alicənablığını görsün, öz qəbahətindən utanıb yerə girsin...

Cavanşir

Bəhramdan heç bir alicənablıq gözləmirəm, lakin çağır onu...

Fərid

Bu saat... (Gedir)

Cavanşir

Hamınıza xəbərdarlıq edirəm. Sizin aranızda Kayan dövləti ilə ittifaq bağlamaq arzusunda olan varsa, qoy onlar özünü aldatsın, namərd körpüsündən keçən özü də namərddir...

Bəhram, Polad, Kabus və qasid daxil olurlar.

Bəhram

Mən bura – Girdmana dost kimi gəlmişdim. Lakin məni düşmən kimi yola salırlar. Belə rəftarın səbəbi mənə bəlli deyildir...

Cavanşir

Möhtərəm elçi, Kayan tacidarına söylədiniz ki, mənim qılınca, mərdliyə arxalanan bir ölkəm vardır. Onu yer üzündən silmək istəyənlərə də qılıncla cavab veriləcəkdir...

Bəhram

Mehriban bir dost kimi əl-ələ vermək mümkün ikən, qılıncla danışmağa ehtiyac yoxdur, Cavanşir...

Cavanşir

Mən müqəddəs Ağvanın göylərə baş vuran uca dağlarını bu vaxtadək düşmənlərin quduz hücumundan qorumuşam. İndi isə namərd dostlardan qoruyacağam...

Bəhram

Ulu hökmdarımız ərəblərə qarşı səninlə ittifaq bağlamaq arzusundadır.

Cavanşir

Bu ittifaqın məqsədini bilmək olmazmı?

Bəhram

Məqsəd düşmənə qarşı birgə müharibə...

Cavanşir

Ərəb sərkərdəsinə sülh təklifi aparmışsınızmı?

Bəhram

Düşmənə silah təklifi etmək qorxaqlıqdır.

Cavanşir

Daim müharibə xəyalı ilə yaşamaq isə sərsəmlikdir.

Bəhram

Biz yenə dost ola bilərik, Cavanşir...

Cavanşir

Xəyanətini unutdunmu? Möhtərəm elçi?

Bəhram

İnsanın həyatında səhv ola bilər... İnan ki, Cavanşir, ürəyim həmişə səninlə olmuşdur. Muğan torpağını xarabaya döndərən qəsbkarlardan səni qorumaq üçün işlətdiyim bu müvəqqəti siyasət bizim qardaşlıq məhəbbətimizə mane ola bilməz...

Cavanşir

Hanı Qartal?

Qartal

Burdayam, ulu hökmdar...

Cavanşir

Muğan şəhərində qurulmuş dar ağaclarından asılan kimlər idi?

Qartal

Kayan qoşunlarının əsir tutduqları Ağvan cəngavərləri...

Cavanşir

Eşidirsənmi, möhtərəm elçi? Sədaqətdən dəm vurarkən vicdan ağrısı duyursanmı?

Bəhram

Mən ömrüm boyu bu cinayətlərimi lənətlərlə yad edəcəyəm. Namusuma and içirəm ki, bu ləkəni öz qanımla yumağa hazıram...

Elçin

Atacan, əgər ürəkləriniz bir-birinə yaxınsa, Ağvan dağları heç bir vaxt bizim aramızda səth ola bilməz. Barış, atacan... Qoy sizi ülvi bir məhəbbət birləşdirsin...

Cavanşir

Elçin, əziz balam... Mən Sasanilərlə əbədi dost olmaq fikrində idim. Lakin namərdlər xalqımızın boğazına əsarət zənciri keçirdilər. Qəsbkarların bizdən məhəbbət ummağa heç bir haqqı yoxdur. Əgər biz Kür-Araz sahillərində əzəmətli dövlətimizi yenə bərpa etməsək, bütün el-oba bizə lənət oxumazmı? Sən isə, möhtərəm elçi, hökmdarına bildir ki, mənə göndərdiyin o hədiyyələr Ağvan igidlərinin qanına boyanmışdır. Mən o igidlərin qatillərindən amansız bir qisas almamış bir an belə rahat ola bilməyəcəyəm.

Cavanşir və saray adamları gedirlər. Səhnədə Bəhram, Polad, qasid, Kabus və Saran qalır. Saran gedərkən

Qasid

Qoca, qızıllar da, cavahirat da əldən çıxır. Sən Cavanşiri yola gətir...

Saran

Möhtərəm elçi, get sən xaini başqa yerdə axtar. Mən xəzinədaram, amma qızılı da, cavahiratı da elimin namusundan üstün tutmaram... Get...

Saran gedir

Bəhram

Artıq sülh danışıqlarının mənası qalmadı. Muğan torpağında qurduğum dar ağacları çox azdır. İndi də Girdman üzərinə qoşun çəkəcəyəm... Hanı Söhrab? Onun qəlbini gəmirən şöhrət qurdu indi mənə gərək oldu...

Polad

Böyük sərkərdə, məni əfv edin... Onun əsgəri azdırsa da, bizə qarşı kini çox böyükdür...

Bəhram

Lakin kin ordu deyildir...

Polad

Cavanşirin qəzəbi artdıqca hər bir cəngavəri bir orduya bərabər olur.

Bəhram

Demək Cavanşir səni qorxudur...

Polad

Mən əsil həqiqəti söylərkən, özümün qorxduğuma işarə etmək fikrində deyiləm. Mən deyirəm ki, bu böyük kinə qarşı vuruşmaq mənasızdır...

Bəhram

Kindən də qüvvətli bir ordu vardır...

Polad

O nədir?

Bəhram

Hiylə... Qoy Cavanşir öz qılıncını itiləsin. Mənsə onu hiylə toruna salıb məhv edəcəyəm... Çağırın Söhrabı, o məndən köməyini əsirgəməz. Onun qəlbini gəmirən şöhrət qurdu indi mənə gərək oldu...

Polad

Söhrab ağılsız deyil... O indi Cavanşirdən qorxub bizə kömək verməz...

Bəhram

Sən insanları hələ tanımırsan... Ehtiras quduz bir canavardır, ehtiras ən ağıllı insanları belə, məhrum bir quzu kimi parçalaya bilər...

Söhrab gəlir.

Söhrab

Sözlərimə inanın, böyük sərkərdə, onu bilin ki, Cavanşirin məhəbbəti dilimdə, sənin məhəbbətin isə ürəyimdədir... Siz hər zaman mənim sədaqətimə əmin ola bilərsiniz...

Bəhram

Elə isə gedək... Qoy Kayan hökmdarı mənə daha qüvvətli bir ordu versin. Mən Cavanşirlə yalnız vuruş meydanında danışacağam...

Söhrab

Uğurlu yol... Əgər Cavanşirin qollarındakı gücü bir heç məqamına endirmək istəyirsənsə, sizə daha yeni bir xəbər verə bilərəm...

Bəhram

O nədir, Söhrab?

Aybəniz daxil olur, onların söhbətini eşidib gizlənir və qulaq asır.

Söhrab

Bu gün Cavanşirin o gözəl qadını Zibeydə xatun oğlu Elçinlə Firuzəabada gedir. O, sizin ciyərparənizlə çox gizli bir mətləb barəsində danışmaq fikrindədir...

Bəhram

Mənim ciyərparəmlə?.. Gizli bir mətləb barəsində?

Söhrab

Bəli... Bəli, onları yolda tutub əsir apara bilsəydiniz. Bu, gələcək qələbənin yarısı deməkdir. Uğurlu yol... Söhrabı unutmayın... Zaman gələr Kayan tacidarı özü də məndən təşəkkürünü əsirgəməz.

Bəhram, Polad, qasid və Kabus gedirlər, Aybəniz daxil olur.

Aybəniz

Sən nə elədin, Söhrab... Nə üçün vicdanına silinməz bir ləkə vurdun...

Söhrab

Aybəniz... Ləkə nədir?

Aybəniz

Bütün elin, obanın nifrətindən qorxmursanmı? Qardaşım, Cavanşirə xəyanət nə böyük nankorluqdur.

Söhrab

Suss... Suss... Sən hansı xəyanətdən danışırsan? Burax sərsəmliyi...

Aybəniz

Mən Bəhramla sənin söhbətini başdan ayağa dinlədin... Bu fikirdən əl çək, qardaşım... Böyük hökmdarımız bu əhvalatdan xəbər tutsa... Səni bir an belə sağ qoymaz... Yalvarıram sənə, get özün ona xəbər ver ki, düşmənlər Zibeydə xatunu hiylə toruna salmaq istəyirlər. Qoy onu Firuzəabada göndərməsin...

Söhrab

Sənin ağlın başında deyil, nədir? Heç nələr sayıqladığını bilirsənmi?

Aybəniz

Sən deməsən də, mən deyəcəyəm...

Söhrab

Dilini dibindən kəsərəm...

Aybəniz

Kəs... Aman...

Söhrab

Cınqırını çəksən...

Aybəniz

Ən uzağı ölümdür... Ölümdən qorxan səndən də namərddir... Ah...

Söhrab Aybənizi xəncərlə vurub öldürür.

Söhrab

Ah... Mən nə etdim... Demək, Elçin onun məhəbbətini rədd etdiyi üçün öz-özünü vurdu... Ah, əziz bacım. Fəlakət... Fəlakət...

Cavanşir və bütün saray adamları daxil olurlar

Cavanşir

Bu nədir?.. Bu nə dəhşətdir?

Söhrab

Böyük ata... Mənim bacım, ata-ananın yeganə yadigarı, Elçinin rədd cavabından sonra özünü həlak etdi.

Cavanşir

Mənim oğlum Elçin...

Pərdə

Клавиши ← → для перехода, R — случайное стихотворение

Случайное стихотворение

Другие произведения автора

Стихи других поэтов