Страница 2 из 5 · 20%

Camal (iki əlini qaldırır)

Atam! Mən təslim. Sən məndən ağıllısan... Bilirəm, nə üçün işləmək istəyirsən. Neçə il təqaüd almısan, bəs işləməsən nə deyərlər? Lap istəyirsən, gəl mənim kontorumda mühəndis ol. Qoymaram əlini ağdan-qaraya vurasan. Ölməmişəm ki...

Bənövşə

Sən qəribə fikirlər irəli atırsan, qəribə sözlər danışırsan.

Camal

Dedim ki, mən təslim. Özüm öz xahişimlə sənə əsir düşürəm... Əsiri öldürməzlər ki...

Yusif gəlir.

Yusif

Nə mənzərədir?! (Öskürür) Mane olmadım ki...

Bənövşə

Yusif, xoş gördük!

Görüşürlər.

Yusif

Xoş gəlmisiniz, Bənövşə! Deyəsən, söhbətinizə mane oldum.

Bənövşə

Yox-yox... İçəri gəlin... Görürsünüz, mən hələ hücum eləməmişdən Camal təslim olub.

Yusif

Yəqin xasiyyəti dəyişib, o həmişə məğlub olur, ancaq təslim olmur...

Camal

Adamına baxır da...

Bənövşə

Nə olub? Yoxsa aranız soyuqdur. Bəs bir neçə il bundan qabaq can deyib, can eşidirdiniz?

Camal

Bir elə şey yoxdur. Yusifdir də... gah dalaşırıq, gah barışırıq... Mənə qalsa, on dəqiqədən sonra hirsim soyuyur.

Yusif

Hirs soyumağına soyuyur, amma yenə iş əvvəlki kimi qalır. Məsləhətçiləri qoymur ki...

Camal

Yusif, bu saat idarə söhbətlərinin yeri deyil.

Yusif

İdarədə deyirsən yeri deyil, burada deyirsən yeri deyil. Bəs harada danışaq, göydə?

Camal

Mənim ruhum bu saat həqiqətən göydədir. Dalımca çıxa bilsən, gəl danışaq.

Bənövşə

Göyə niyə çıxırsınız? Danışmaq istəyirsiniz, gedək evə. Camal, Yusifi evə dəvət elə.

Camal

Sən ki, mənim nişanlımı təbrikə gəlmisən, gündüzkü söhbətlər ləğv olunur. Uzat əlini, buyur evə.

Yusif (istər-istəməz Camal ilə görüşür)

Çox sağ ol. Mən, əslində, iclas olacağını xəbər verməyə gəlmişəm.

Camal

İclas?.. Ay-hay... Özgə vaxtda mədəniyyətdən danışırsan. Bu həngamədə iclas vaxtıdır?

Yusif

İclası mən çağırmıram, trest çağırır, səndən, məndən başqa bizim idarədən çox adam çağırıblar. Qabaqcıl fəhlələri, ustaları... Bizim məsələmizi müzakirə edirlər...

Camal

Əşi, nə danışırsan? Tərsliyə bax ha...

Yusif (Bənövşəyə)

Trestin rəisi sizi də soruşurdu, dedim gəlib...

Camal

O sənin gələcəyini haradan bilir?

Bənövşə

Yəqin Bakıdan deyiblər.

Camal

Dayan, mən bir zəng eləyim. (Səhnədən çıxmaq istəyir)

Bənövşə

Hara gedirsən, Camal? Evdə telefon var ki.

Camal

Hə, düz deyirsən... Lap rulu itirmişəm...

Qəmər pəncərədən səslənir.

Qəmər

Bənövşə! Səni telefona çağırırlar. Deyir trestdəndir.

Bənövşə

Gəldim... (Cəld evə girir)

Camal (onun arxasınca gedəndə, Yusifə)

Aşna, bunlar hamısı sənin işindir. Bircə dəqiqə idarədən ayrılan kimi məsələni yaman dolaşdırdın... (Evə gedir)

Yusif getmək istədikdə, Qəmər onu pəncərədən görür.

Qəmər

Yusif!

Yusif (geri dönür)

Bu nədir? Gözlərimə inana bilmirəm!

Qəmər pəncərədən əlini uzadır, görüşürlər.

Qəmər

Burada işləyirsiniz?

Yusif

Bəli... Sizdən nə əcəb? Yəqin Bənövşənin toyuna gəlmisiniz.

Qəmər

Yox, həmişəlik gəlmişəm. Burada, xəstəxanada işləyəcəyəm. Mən həkimlik oxuyurdum axı, yadınızdan çıxıb?

Yusif

O günlər hamısı bir-bir mənim yadımdadır. Bəlkə siz unutmusunuz?

Qəmər

Heç bədbəxtlik unudularmı?

Yusif

Bədbəxtlik nə üçün? Məndən daha yaxşısını sevdiniz, ərə getdiniz, əriniz yəqin bir hörmətli adamdır, uşaqlarınız var. Kasıb bir tələbəni unutmaq çox asandır.

Qəmər

Yox, elə olmadı, Yusif! Məni aldatdılar, hörmətsiz, ləyaqətsiz bir adam məni aldatdı. Altı ay cəhənnəm əzabı çəkəndən sonra ayrıldım. Həm uşaq saxladım, həm də oxudum.

Yusif

Mən belə olduğunu bilmirdim, Qəmər! Bağışlayın, keçmişləri nahaq yada saldım.

Qəmər

Keçmişdən xoş xatirələr də var. Yadınızdadırmı? O günlər mənim həyatımın ən xoş dəqiqələridir. (Sükut) Siz çoxdan buradasınız? Yəqin bütün ailəliklə köçüb burada yaşayırsınız?

Yusif

Anam, qardaşım Bakıdadırlar. Mən özüm burada tək oluram. Ayrı bir ailəm yoxdur. O gündən, sizin ərə getdiyinizi öyrəndiyim dəqiqədən, ömrümün axırına kimi evlənməməyə söz verdim.

Camal və Bənövşə həyətə düşürlər. Qəmər tez çəkilir. Yusif pəncərədən ayrılır.

Camal

Yaman həngamədir. Qoymurlar adam nişanlısı ilə iki kəlmə danışsın.

Bənövşə

Nə isə, məsələ çox ciddidir. Sənin vəziyyətin necədir, Camal? Mənə düzünü de.

Camal

Necə olacaq, maşın kimi... Bir həftəyə planı dolduraram.

Yusif

İş təkcə planda deyil ki.

Camal

Yusif! Səndən xahiş elədim ki, qapını hələlik bağla!

Yusif

Tutaq ki, burada danışmadım... Trestdə bağlı qapının dalında oturmaq olmayacaq... Orada havanı çox sevirlər, istəyirlər qapılar da, pəncərələr də açıq olsun.

Camal

Olsun da... (Tələsik qapıya sarı gedir) Mən bu saat...

Bənövşə

Hara gedirsən, Camal? Dayan, mən trestin təzə binasını tanımıram.

Camal

Bu saat qayıdıram, gedim bu zəhrimarları dəyişim. (Ayaqqabıları göstərir)

Bənövşə

Eybi yoxdur. Sən oradan düz trestə gələrsən. Məni Yusif aparar.

Camal (cəld geri qayıdır)

Necə, necə? Saxla, özüm aparacağam. Ayaqqabıları dəyişməli olmadım.

Ceyran xala və Qəmər səhnəyə gəlirlər.

Ceyran xala

Bəs, nə vaxt qayıdacaqsınız, Bənövşə? Axşama xörək hazırlayıram.

Bənövşə

Axşamacan qayıdarıq, anacan. Sən Qəmərdən muğayat ol! Qəmər, mənim əvəzimə anama kömək elə!

Qəmər

Sən deməmişdən də eləyərəm. Onsuz da bilirəm, səndən Ceyran xalaya qız olmayacaq.

Ceyran xala

Nə yaxşı dedin, doktor! Belə qız olar? Qoymadı ki, doyunca üzünü görüm.

Bənövşə

Anacan, tez qayıdacağıq, arxayın ol. Qəmər, sən Yusiflə tanış deyilsən? Tanış ol. Yusif Camalın ən yaxın dostudur.

Camal

İdi...

Qəmər (gülməyini güclə saxlayır)

Bənövşə mənə sizdən o qədər danışıb ki...

Yusif

Mən də Bənövşənin xətrini çox istəyirəm.

Camal

Aman, aman, aman... (Ayağını tutur)

Bənövşə

Nə oldu, Camal?!

Camal

Bu mədəniyyət məni sıxıb öldürmədi?.. (Tərs-tərs Yusifə baxır) Zəhrimar başıma vurur.

Yusif

Mədəniyyət ayaqdan başlayanda həmişə başa vurar.

Bənövşə

Gedək... Camal, gir qoluma, mənim köməyim olmasa, sən trestə kimi öz ayağınla yeriyə bilməyəcəksən.

Çıxırlar. Qəmər evə girir. Ceyran xala onları həyət qapısına qədər ötürüb geri döndükdə, Zərifə ilə rastlaşır.

Zərifə

Ceyran xala, təbriklər! Lap vağzala gedəcəkdim, amma paltarımı, tuflimi dəyişincə gecikdim. Bu gülləri də götür suya qoy, lap “Krasnı Moskva” iyi verir. Bənövşə bacı haradadır?

Ceyran xala

İclasa getdi.

Zərifə

Toy eləməkdənsə, iclasa getdi? Daha mənim heç sözüm yoxdur. Heyf! Yenə gecikdim.

Ceyran xala

Axşam atanla bərabər bizə qonaq gələrsən, Bənövşəni də görərsən.

Zərifə

Gələrəm, niyə gəlmirəm? İstəyirsən, lap qabaqcadan gəlim, sənə kömək eləyim? Hə, Ceyran xala?

Ceyran xala

Sağ ol, qızım.

Zərifə

Qonaqların siyahısını tutmusan? Onda ver mənə, telefonla hamısına xəbər verim. Ya heç siyahı lazım deyil. İdarədəkiləri bir ucdan çağırım? Camal yoldaşın o qədər dostu var ki... hamı xətrini istəyir...

Ceyran xala

Yox-yox, nə danışırsan? Lazım deyil... Sən zəhmət çəkmə, lazım olan adamlara özüm deyəcəyəm.

Zərifə

Yaxşı, onda gedim vaxtında hazırlıq görüm. Gülləri ver, gələndə özüm gətirərəm.

Gülləri Ceyran xalanın qucağından alıb çıxır. İşıq sönür.

Клавиши ← → для перехода, R — случайное стихотворение

Случайное стихотворение

Другие произведения автора

Стихи других поэтов