Birinci pərdə
Məzmun
Səhifə 7 / 8 · 75%
Pişik!
Aslan
Can!
Şəlalə
Gələndə bazarlıq elə.
Aslan
Baş üstə, gəl üzündən öpüm.
Şəlalə
Utandırma məni.
Aslan onun saçlarından öpdükdə səhnə qaranlıqlaşır.
Yeddinci şəkil
Aslanın xatirəsinin davamı. Yeni otaq, təzə mebel. Aslan səliqə düzəldir, arabir nəşə ilə zümzümə eləyir. Tərlan xanım içəri girir.
Aslan
Xoş gəlmisən, ay xala!..
Tərlan xanım
Bonjur!
Aslan
Barjom da, hələ üstəlik Narzan da.
Tərlan xanım
Şəlalə haradadır?
Aslan
Univermağa getdi. Deyirəm ağız, nə deyirsən alım gətirim, ayağına niyə zəhmət verirsən? Razı olmur. Dükanları gəzməyə həvəsi var.
Tərlan xanım
Bu otaq özünüzündür?
Aslan
Hələlik kirayədir. (Yavaşdan) Sonra çırpışdıracağam. Kirayə ki verir, deməli, artıqdır. Artığı da saxlamağa ixtiyarı yoxdur.
Tərlan xanım
Kəs kitudi se ton vol.
Aslan
Nə dedin?
Tərlan xanım
Fransızcadır, sən başa düşməzsən.
Şəlalə gəlir. Əynində yeni paltar. Xarici görkəmi dəyişmişdir.
Şəlalə
Xala, ayağın var olsun. Yaxşı ki, gəlmisən. Görürsən, nə mənzilimiz var?
Tərlan xanım
Zövqsüz bəzənib.
Şəlalə
Aslandır da. Dedim mənsiz əl vurma, qulaq asmadı.
Aslan
Nə cür istəyirsən, özün düzəlt. Sənin bir sözünü mən nə vaxt iki eləmişəm?
Şəlalə
Sonra düzəldərəm. Get çay qoy, xala tünd çayı çox sevir.
Aslan
Çayım hazırdır.
Şəlalə
Onda düş aşağı, mağazadan peçenye al. Xala çayı həmişə peçenye ilə içir.
Tərlan xanım
İnək peçenyesi.
Aslan
Gedirəm. (Qapıdan çıxmaq istəyir)
Şəlalə
Pişik!
Aslan (qayıdır)
Nə deyirsən?
Şəlalə
Pirojna da al.
Aslan (yavaşdan Şəlaləyə)
Bəlkə xalanın ürəyi ər istəyir, gələndə birini tapıb gətirim, yaxam onun əlindən qurtulsun.
Şəlalə
Aslan, mədəniyyətsiz olma. Eşidər, bilirsən neyləyər? Di tez get.
Aslan
Bax, bu gözlərim üstə. (Çıxır)
Tərlan xanım
Getdi?
Şəlalə
O saat. Ağzımdan söz çıxmamış yerinə yetirir. Su köşkündə, bir dəqiqə rahat otura bilmir. Dəqiqədə bir qaçır evə. Məni çox istəyir. Hayıf ki...
Tərlan xanım
Hayıf ki, nə?
Şəlalə
Hayıf ki, mən onu istəmirəm. Ha çalışıram ürəyimi bağlayım, olmur. Nə bir sözü-söhbəti var, nə bir dostu-aşnası var... Teatra getmir, kino başa düşmür, bircə qısqanmaq bilir, küçəyə niyə çıxdın, univermağa niyə getdin?
Tərlan xanım
Birinci gündən demişəm, o, sənin tayın deyil.
Şəlalə
Özün tanış eləmisən ki.
Tərlan xanım
Nə bilim? Dedilər hökumət qulluğundadır, əli işdədir. Sən də qalmışdın ortada. Su satan olduğu heç ağlıma gəlməzdi.
Şəlalə
Qismət belə imiş.
Tərlan xanım
Mən qismətə inanmıram. Ömrün boyu bir axmağın qarovulunu çəkməyəcəksən ki? Ərin pisdir, rədd elə getsin! Gör gəlmir ki, xəlvət sözüm var.
Şəlalə
Yox ey... gələndə ayağının səsi küçədən eşidilir.
Tərlan xanım
Səni bir yaxşı yerdən istəyən var.
Şəlalə
Ərli arvadı istəyən?
Tərlan xanım
Ərin olduğunu deməmişəm. Buna sənin ərin deməyə düzü dilim gəlmir. Sən beləsinə yox, knyaza layiqsən.
Şəlalə
Neyləyim? İndi daha knyaz-mnyaz yoxdur.
Tərlan xanım
Bu zəmanənin də öz knyazları var. O vaxtın İsrail bəyi indi dönüb olub İsrail yoldaş. Səni istəyən adam naçalnikdir. Bir əli yuxarıdakıların əlindədir, bir əli də kassada...
Şəlalə
Aslan eşitsə ikimizi də tikə-tikə doğrayar.
Tərlan xanım
Qələt eləyər, tikə-tikə doğrayar. Bu gözəllik ki, səndə var, bir kişidə qalmayacaqsan ki? Saleh yoldaş səni uzaqdan bir dəfə görüb, ölür dərdindən. Deyir onu mənə bir də göstər dünyanın cavahiratını töküm ayağının altına.
Şəlalə
Sən məni yoldan çıxardırsan, ay xala!
Tərlan xanım
Mən səni tozlu-palçıqlı yoldan çıxardıb asfalt yola salmaq istəyirəm.
Şəlalə
Axı, mən o İsrail bəyi heç görməmişəm.
Tərlan xanım
İsrail bəy yox ey... O çoxdan ölüb. Saleh yoldaş.
Şəlalə
Cavandır?
Tərlan xanım
Kişinin nə qocası, nə cavanı? Sevgi-mevgi havayı sözdür. Qadın gərək çiçək kimi əldən-ələ gəzsin. Saleh yoldaş ixtiyar sahibidir.
Şəlalə
Harada işləyir?
Tərlan xanım
Az, mənim nəçəlniyimdir də... Əlinin altında inpoşivlər, dərzi artelləri... Daha sənin bu yetimçən kimi qazlı su satan deyil.
Şəlalə
Dəlisovdur ey, qorxuram.
Tərlan xanım
Yalan danışma, qorxub-eləmirsən. At kimi minmisən, sürürsən. Aslanı döndərib pişik eləmisən, görmürəm? Amma bir az pal-paltarını dəyiş, üst-başına fikir ver.
Şəlalə
Yaxşı parça tapa bilmirəm.
Tərlan xanım (özüylə gətirdiyi parçanı ona göstərir)
Gör nə parçadır?
Şəlalə
Xala, o nədir elə, par-par parıldayır.
Tərlan xanım
Hindistandan gəlib.
Şəlalə
Ver baxım. (Üstünə ölçür) Xala, ürəyim gedəcək.
Tərlan xanım
Ürəyin niyə gedir? Sənə gətirmişəm.
Şəlalə
Hədiyyə?
Tərlan xanım
Keçmiş vaxt olsaydı, İsrail bəy...
Şəlalə (onun sözünü kəsir)
Uzatma, neçəyədir?
Tərlan xanım
Dördə deyirlər. Mən səndən üç alıram.
Şəlalə
Bizdə o qədər pul haradandır?
Tərlan xanım
Kül onun kişi başına, evdə o qədər pulu da yoxdur?
Şəlalə
Gündəliyi gündə xərcləyirik.
Tərlan xanım
Çünki təcrübəsizsən. On manat xərcləmisənsə, de iyirmi manat xərcləmişəm. On manatı qatla qoy bir tərəfə. Yığ, xəlvətdən yığ. Kişilərə etibar yoxdur. Evdə gümanın gələn bir şey tapa bilməzsən?
Şəlalə
Üç faizli istiqraz var.
Tərlan xanım
Gətir bəri, üçfaizli istiqraz da puldur.
Şəlalə (şkafı axtarır, istiqrazları çıxarır)
Budur, burdadır.
Tərlan xanım
Tez elə, gəlib həyasızlıq salar. (Alıb gizlədir)
Şəlalə
Orada çoxdur, axı.
Tərlan xanım
Artığına bir parça da gətirərəm.
Şəlalə
Bəs mən ona nə deyim?
Tərlan xanım
Hələlik üstünü vurma. De parçanı mənə xalam gətirib, peşkəş. Sonra başa düşəndə, “istiqraz hanı” deyib soruşanda, bax, çiyinlərini bu cür çək, de ki, “sanevu zeenterespa”.
Şəlalə
O nə deyən sözdür?
Tərlan xanım
Yəni yaxşı eləyib xərcləmişəm, sənə nə?
Şəlalə
Gəlir. (Tez otururlar)
Aslan qoltuğunda şeylər içəri girir.
Aslan
İnək peçenyesi tapa bilmədim, selyotka aldım.
Şəlalə
Çay ilə selyotka?
Tərlan xanım
Qara adamdan hər nə desən gözləmək olar.
Aslan
Araqla necəsən, xala?
Tərlan xanım
İsrail bəy mənə həmişə finşampan təklif eləyərdi.
Aslan
Əlli il bundan qabaq olsaydı, mən də şimfanpan təklif eləyərdim. Amma indi daha sənin malın araqdır. (O biri otağa gedir)
Tərlan xanım
Mən gedirəm, yoxsa, başa düşüb cəncəl çıxardar. (Gedir. Aslan qayıdır)
Aslan
Bəs xalan nə oldu? (Şəlalə küsmüş halda dayanır) Şəlalə! (Şəlalə yenə dinmir) Xala incidi, getdi hə? Deyəsən məndən küsmüsən? Mən sənin pişiyinəm, adam öz pişiyindən inciməz ki?
Şəlalənin əlindən öpür. Səhnə qaranlıqlaşır.
Kitabxana.az · https://kitabxana.az/works/sabit-rehman-yalan-birinci-perde
← → düymələri ilə keçid, R — təsadüfi şeir
Müəllifin digər əsərləri
Səkkizinci şəkilBakının küçələrindən biri. Əlibaba ilə İmamqulu Kəblə Muxtarı gətirib güclə bir daşın üstündə oturdurlar.*
Əliqulu evlənir4 pərdə, 5 şəkildə*İştirak edənlər
Birinci pərdəBirinci şəkilPərdə qabağı. Sol tərəfdə telefon budkası, sağda ağac və skamya. Bunlar sona qədər bu cür qalır.*
İkinci pərdəİkinci şəkilYasəmən əlində bir dəstə çiçək pərdə qabağına çıxır.*