Xilqətdə sənintək, gözəlim, can ola bilməz,Əxlaqı gözəl, sevgili canan ola bilməz!

Fəxr eyləməsin öz gülünə bülbüli-şeyda,Bir gül hələ də sən kimi xəndan ola bilməz!

Minlərcə gözəllər yetirir gündə təbiət,Amma sənə bənzər gözəl insan ola bilməz!

Yüzlərcə əgər hüsnünə adam ola heyran,Bir kimsə mənimtək sənə heyran ola bilməz!

Sən tərbiyədə, hüsndə bir başqa gözəlsən,Rəftarinə, əxlaqinə nöqsan ola bilməz!

Hürriyyətə, insanlığa layiq səni gördüm,Hər kəs səni sevmişsə, peşiman ola bilməz!

Öz aşiqinin naz ilə qan eyləmə könlün,Hürriyyət olan yerdə könül qan ola bilməz!

Hər xoş görünən kimsəyə aldanma heyifsən,Hər xoş görünən kimsədə vicdan ola bilməz!

Bu hüsnlə çoxlar səni istər sevə, ey gül,Vahid kimi eşqində qəzəlxan ola bilməz!

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri · Eşq