Muğan qalası

Bəhram

Heç bir zaman ehtiyatı əldən verməyin, unutmayın ki, biz zəbt olunmuş bir şəhərdəyik. Cavanşir Muğan qalasını geri almamış bir an belə, rahat ola bilməyəcək. Əsirləri gətirin. Qala qapılarını yoxlayın. Keşikçiləri gözdən keçirin. Aydındırmı?

Polad

Aydındır...

Bəhram

Hanı Qartal? Mənə qarşı qiyam etmiş o sərsəmi nə üçün qandırmadınız?

Kabus

Qartal dünəndən bəri şüurunu itirmişdir. Yalnız indi özünə gəlmiş.

Bəhram

Yoxsa ona işgəncə vermişsiniz?

Kabus

Xeyr, xeyr. O, vuruşmada yaralanmış, çoxlu qan itirmişdir. İndi isə artıq ayağa qalxmış. Baxın, onu gətirirlər...

Gözətçilər qartalı halqa içərisində gətirirlər. Qolları və qıçları qandallı, üst-başı qan ləkələri ilə örtülmüşdür, saçları dağınıq. Lakin o qürurla dayanmışdır.

Bəhram (Qartala)

Siz məğlub oldunuz... Mənə qarşı qiyam yatırıldı.

Qartal

Yox... Yatırıldı deməyin, qan dənizində boğuldu deyin...

Bəhram

Hökmdarınız Cavanşir isə köməyinizə gəlmədi.

Qartal

Doğrudur, gəlmədi. Çünki Ağvanın şimalında vəhşi xəzərilərlə vuruşur. Mən inanıram ki, böyük sərkərdəmiz Cavanşir düşmənləri əzib vətənimizin müqəddəs torpağından kənara atacaq. Sonra da buraya, Muğan şəhərinə hücum edib sənin qanlı hökmranlığını yıxacaqdır. O zaman namərdliklə qəsb etdiyimiz bu Ağvan torpağı azad nəfəs alacaqdır.

Bəhram (Polada)

Eşitdinmi o nə dedi?

Polad

Bəli, möhtərəm sərkərdə, eşitdim...

Bəhram

Səncə bu körpə uşağın ağlı başındadırmı? (Qartala) Sönüb külə dönmüş bir od, heç nəyi yandıra bilməz. Cavanşir artıq sönmüş bir oddur. Cavanşir... Hücumu... ha, ha, ha...

Qartal

Bu gün gülürsünüz, lakin sabah ağlaya bilərsiniz...

Bəhram

Sasani dövlətinin önündə dayana biləcək bir qüvvə yoxdur.

Qartal

Lovğalıq gücsüzlərin silahıdır.

Bəhram

Burax bu inadı, Qartal... İndi ki, mən səni öldürmək fikrində deyiləm. Mən səni əfv etmək istəyirəm. Yalnız bir şərtim var... Sən həmvətənlərinə üz tutub deməlisən ki, daha bəsdir bu üsyanlar. Artıq inadınızdan əl çəkin. Qiyamlara son qoyun. Doğrusu, bu qanlı dar ağacları məni artıq təngə gətirmişdir.

Qartal

Mən də dar ağacını gözləyirəm.

Bəhram

Demək, sən öz igidliyin müqabilində yalnız bu mükafatı istəyirsən? Təəssüf, çox təəssüf...

Qartal

Görürəm ki, sənin həris gözlərin hələ də qandan doymamışdır.

Bəhram (qəzəblə)

Aparın, bu inadkar sabah dar ağacından asılacaqdır.

Gözətçilər Qartalı aparırlar.

Polad

Möhtərəm vali, vuruşma meydanında basılmış igid bir əsgəri dar ağacına göndərmək bizim şənimizə yalnız ləkə gətirə bilər.

Bəhram

Nə etməli, Polad. Zəmanəmiz qanla yoğrulmuşdur. Bu mənim günahım deyildir. Mən Muğanı da öz xoşumla zəbt etmədim. Bu, ulu hökmdarın əmri idi. Cənubda qəsbkarlar hücuma başlayıb ölkəmizi taladılar, bu ziyanı yalnız Ağvanın tükənməz sərvətləri ödəyə bilərdi.

Polad (öz-özünə)

Yox, yox, mən Qartalı ölümdən qurtarmalıyam... (Getməyə hazırlaşır, işıq sönür, pərdə salınır)

Клавиши ← → для перехода, R — случайное стихотворение

Случайное стихотворение

Другие произведения автора

Стихи других поэтов