Sən həmişə mənimləsən, yaxud "Boy çiçəyi"
Səhifə 7 / 13 · 46%
Həsənzadə
Bəzən adam elə xoşbəxt yuxular görür ki...
Nargilə
Nə görürdünüz?
Həsənzadə (zarafatyana)
Yuxunu danışsan, kəsərdən düşər... Yaxşısı budur, siz deyin, görüm haradan gəlirsiniz?
Nargilə (məyus halda)
Nə üçün yuxunuzu danışmaq istəmirsiniz?
Həsənzadə papiros yandırır. Göy bir də şiddətlə gurlayır.
Külək söyüd yarpaqlarını tərpədərək uğuldayır.
Həsənzadə
Bərk yağacaq. O əlinizdəki nədir?
Nargilə (daldığı mükəddər xəyaldan ayrılaraq, sevinclə)
Məktubdur. Oğlunuzdan gəlib. (Zərfi ona verərək). Poçtalyon məni yamanca tanıyıb... Bura gələndə... qapıda gördüm...
Lakin Həsənzadənin artıq onu dinləməyərək, məktubu açıb nəzərdən keçirdiyini görüb susur. Həsənzadə məktubu oxuyub qurtararaq, ehtiyatla qatlayıb zərfə qoyur.
Nargilə
Nə yazır?
Həsənzadə
Yaxşıdır. Neft mədənlərindən birində baş mühəndisdir.
Nargilə
Ev tutub?
Həsənzadə
Tutub.
Nargilə
Yaxşı olar. Ağıllı oğlandır.
Həsənzadə
Bu adyalı mənim üstümə siz salmısınız?
Nargilə («hə» mənasında başını tərpədir)
Başqa kim salacaqdı ki?
Həsənzadə
Dedim, bəlkə Ayna xala salıb... O bu gün gəlib paltar yuyası idi. Niyə oturmursunuz? Gəlin əyləşin.
Nargilə (acıqlı)
Oturmuram.
Həsənzadə
Nə üçün?
Nargilə
Çünki siz məni istəmirsiniz...
Həsənzadə (səmimi təəccüblə)
Mən sizi istəmirəm?..
Nargilə
O cür istəmək demirəm.
Həsənzadə
Bəs nə cür deyirsiniz?
Nargilə (acıqlı)
Mənim kimi!
Həsənzadə (zarafatyana)
Mən sizin kimi istəyə bilmərəm... Siz cavansınız...
Nargilə
Siz qocasınız?
Həsənzadə
Hər halda, sizdən iyirmi altı yaş böyüyəm.
Nargilə (acıqlı)
İyirmi altı yox, iyirmi beş! Mən srağagün on doqquzu bitirdim.
Həsənzadə
Demək, biz bir gündə anadan olmuşuq... srağagün mən də qırx altıya adladım.
Nargilə
Nə olsun? Qırx altı nədi ki... (Birdən acıqlanaraq). Heç bilmirəm bu nə yaş məsələsidir, salmısınız ortalığa.
Həsənzadə (gülümsəyir)
Yaş faktdır. Faktla hesablaşmamaq olmaz.
Nargilə
Sevən adam yaşa baxmaz.
Həsənzadə
Cavanlıqda adama elə gəlir... Mən də on səkkiz-on doqquz yaşlarında olduğum zaman özümdən iyirmi dörd yaş böyük bir qadına vurulmuşdum.
Nargilə
Bəs sonra nə oldu?
Həsənzadə
Sonra... (Qısa pauza). Sonra Aydının anası ilə evləndim.
Nargilə
Sevib evləndiniz?
Həsənzadə
Bəli.
Nargilə
Demək... əvvəlki qadına olan məhəbbətiniz əslində sabun köpüyü imiş...
Həsənzadə
Bilmirəm... Bəlkə də...
Nargilə
Bəs o qadın necə oldu?
Həsənzadə
Durur, indi yetmiş yaşlı bir qarıdır.
Nargilə (qısa pauzadan sonra birdən özündən çıxaraq)
Siz bununla nə demək istəyirsiniz?
Həsənzadə
Heç nə... Söz-sözü gətirdi.
Nargilə (gəlib onun yanında oturaraq, mehriban tərzdə)
Siz məni istəməsəniz də, mən sizi həmişə... yetmiş yox, lap yüz yaşınız da olsa, sevəcəyəm. Özü də mən sizdən tez qocalıb öləcəyəm. Özünüz görəcəksiniz... (Qısa pauza). Xahiş edirəm, bir də bundan sonra mənimlə yaş barədə danışmayasınız... Yaxşımı?
Həsənzadə
Yaxşı. Danışmaram. (Papiros yandırır və bu zaman bayırda ürəyə yatan bir səslə oxunan «Qaragilə» mahnısı eşidilir. Nargilənin üzü soyuq bir ifadə alır. Həsənzadə dinləyir).
Gəlmişəm otağına oyadam səni,
Qaragilə, oyadam səni. Nə gözəl xəlq eləyib yaradan səni,
Qaragilə, yaradan səni.
Həsənzadə
Bizim ekskavatorçu Rəşiddir.
Nargilə (soyuq tərzdə)
Tanıyıram.
Həsənzadə
Haradan tanıyırsınız?
Nargilə
Zavodda görmüşəm. Özündən müştəbehin biridir.
Həsənzadə
Özündən müştəbeh? Yox, onda tanımırsınız.
Nargilə
Tanıyıram. İki dəfə onun üçün naryad yazmışam. Bir az yaraşıqlıdır, bir az da səsi var deyən, elə bilir alçacıq dağları bu yaradıb.
Mahnı davam edir.
Qızıl gül əsdi,
Səbrimi kəsdi...
Nargilə (mahnının qurtarmasını gözləməyərək qalxır)
Bayaq dediniz ki, yuyulası şeyləriniz var.
Həsənzadə
Siz zəhmət çəkməyin. Ayna xala gəlib aparar. Bir dəfə tünd bir türk kofesi hazırlarsınız, içərik.
Nargilə (sevinclə)
İstəyirsiniz lap bu saat hazırlayım.
Həsənzadə
Yox, zavodda istehsalat müşavirəsi çağırmışam.
Nargilə
Həmişə mən gələndə sizin ya işiniz olur, ya iclasınız. (Gülür). Məktəbdə «iclas var» deyən kimi «c»nın yanına «r» qoyurdum.
Həsənzadə
Neyləyirdiniz?
Nargilə (bərkdən gülərək)
Qaçırdım!.. (Rəşidin oxuduğu mahnının ardı eşidilir. Nargilənin üzü dərhal soyuq və ciddi ifadə alır). Deyəsən, bu ekskavatorçu bu gün bizə konsert vermək fikrindədir.
Həsənzadə
Cavan oğlandır, kefi gəlir, oxuyur.
Nargilə
Bah... bah... cavan oğlan...
Həsənzadə
Bəs necə... gənclik – nəğmə deməkdir.
Nargilə (tutqun halda)
Bilmirəm! Belə obrazlı ifadələr barəsində fikirləşməmişəm. Hələlik. (Getmək istəyir).
Həsənzadə
Dayanın. Nə üçün acıqlanırsınız?
Nargilə (sərt şəkildə)
Çünki siz mənim sözlərimi bir qəpiyin yerində qoymursunuz.
Həsənzadə
Nə danışırsınız!.. Hansı sözlərinizi?
Nargilə
Hansı sözlərinizi... Mən sizə dedim ki, bu cavanlıq-qocalıq məsələsini az ortaya salın! Siz də söz verdiniz...
Həsənzadə
Bağışlayın, yadımdan çıxdı... Skleroz...
Nargilə (yanıb tökülərək)
Bax, görürsünüz?! Siz düzəlməzsiniz, vəssalam. Necə sklerozzusunuz ki, zavodda olan səkkiz yüz işçinin hamısını uşaqlarına qədər adbaad tanıyırsınız?!
Həsənzadə
Nə bildiniz?
Nargilə
Camaat danışır, mən də eşidirəm. Qulaqlarımı tutum?
Həsənzadə
Yox, qulaqlarınızı nə üçün tutursunuz? Yaxşı sözü həmişə eşitmək lazımdır.
Nargilə (birdən qəhqəhə ilə gülərək)
Görürsünüz... Yaxşı olduğunuzu özünüz də təsdiq edirsiniz...
Həsənzadə
Mən, ümumiyyətlə, deyirəm...
Nargilə
Qurtardıq! Bir də bu mövzuya qayıdanı qurd yesin. Mən getdim.
Sürətli addımlarla qapıya tərəf yönəlir. Birdən geri dönərək Həsənzadəyə yaxınlaşır. Qarşısında dayanıb, ona baxır... Nəhayət, nəzərlərini endirərək Həsənzadənin əlini sol əli ilə bərk-bərk sıxıb tələsik çıxır. Həsənzadə qızın sıxmış olduğu əlini qeyri-iradi bir hərəkətlə qaldırıb baxır. Lakin onun fikrinin uzaqlarda olduğu görünür. Birinci şəkildəki musiqinin ardı davam edir. İşıq yavaş-yavaş zəifləyir, nəhayət, sönür. Yananda Nargilənin otağı görünür. Qız öz mahnısını zümzümə eləyə-eləyə stolun üstündə xəmirdən yuxa açır, sonra doğrayıb nə isə hazırlayır. Onun üzündə xoş bir ifadə var. Telefon zəng vurur. Nargilə yüyürüb dəstəyi götürür. İndi işıq yalnız onun və telefon xəttinin o biri ucunda olan Sarısaç qızla tanış iki oğlanın üzərinə düşür.
Sarısaç qız
Salam, Nana. Harda itib-batmısan?
Nargilə
Harada olacağam, zavodda... evdə... indi mən iş adamıyam.
Sarısaç qız
Bah... bah... iş adamı.
Nargilə (zarafatyana)
Bəs necə?
Sarısaç qız
Nana, doğrudurmu ki, deyirlər, sən sement zavodunun direktoru Həsənzadə ilə gəzirsən?
Nargilə
Gəzmirəm, mən onu istəyirəm... sevirəm, aydındırmı?
Sarısaç qız (işvə ilə)
Başa düşürəm, Nana, gümüşü saçlar... hələ təravətini itirməmiş çöhrə!... Maşın... vəzifə... pul... bir sözlə: xalis Amerika zövqü! (Səsini alçaldaraq). Naverno, on bolşoy razvratnik...
Nargilə (ciddi şəkildə)
Mən onun haqqında sənin belə danışığına icazə vermirəm.
Sarısaç qız (eyni işvəkarlıqla)
Yox a... deyəsən, gerçəkləmisən. Bəlkə sən ona ərə getmək istəyirsən?
Nargilə
Əlimdə işim yarımçıq qalıb, xahiş edirəm sonra zəng edəsən...
Oğlanlar Sarısaç qıza mətləbə keçməyi him edirlər.
Sarısaç qız
Nana, bu gün dənizçilər evində tans var.
Nargilə
Tans?
Sarısaç qız
Ahaaa... (Qısa pauza). Gəlirsən?
Nargilə
Yox, gələ bilməyəcəyəm.
Sarısaç qız (ikinci oğlana baxaraq işvə ilə)
O hələ də gözləyir ha...
Nargilə
Kim?
Sarısaç qız
O gün demədim?..
Nargilə
Gələ bilməyəcəyəm...
Sarısaç qız
Ah, sən nə qədər staromodnı olmusan, Nana! Yaxşı... hələlik...
Nargilə ilə görüşmək istəyən oğlan ağzını telefon dəstəyinə tutaraq.
İkinci oğlan
Əlvida, Nana!
Çapıq Davud isə dişlərini bir-birinə sürtərək vəhşi görünüşlə ağzını uzadıb Sarısaç qızın qulağını dişləyir. Qız qışqıraraq dəstəyi asır. Onların üzərinə düşən işıq sönür. Nargilə dəstəyi yerinə qoyaraq, işinin üstünə qayıdır. Nəzakət xanım əlində ağ salfetə bükülmüş qab gəlir.
Nəzakət (qabı stolun üstünə qoyaraq)
Salam, qızım.
Nargilə
Salam, ana.
Nəzakət
Sənin üçün kotlet gətirmişəm.
Nargilə
Fərəc ezamiyyətə gedib? (Nəzakət nəzərlərini ondan qaçıraraq, başının hərəkəti ilə təsdiq edir). Nə zəhmət çəkirdin...
Nəzakət
Nə üçün belə sözlər danışırsan? Məndən qisas alırsan?
Nargilə
Mən heç bir zaman səndən qisas almaq fikrində olmamışam, ana. Əgər belə bir qüvvəm olsaydı...
Nəzakət
Hələ əvvəlcə öz həyatın haqqında düşün, qalsın dünyanı düzəltməyin. Fərəcin rəisi, oğlu üçün sənə elçi gəlmək istəyirmiş. Həsənzadə ilə olan əhvalatı eşidəndən sonra gəlməyib.
Nargilə
Bunu sənə Fərəc dedi?..
Nəzakət
Tutaq ki, o deyib, nə olsun?
Nargilə
Heç... Elə-belə soruşuram...
Nəzakət
Fərəc and içib, rəisi inandırıb ki, heylə şey yoxdur.
Kitabxana.az · https://kitabxana.az/works/ilyas-efendiyev-sen-hemise-menimlesen-yaxud-boy-ciceyi
Müəllifin digər əsərləri
Sisyanovun qərargahı. General Sisyanov Şəki hakimi Səlimxan və üç nəfər əyanın müşayiətilə gələn İbrahim xanı təntənə və hörmətlə qarşılayır.*Sisyanov**
İyirmi birinci şəkilSisyanov böyük ipək çadırda tək var-gəl edir. Mayor Lisaneviç daxil olur.*Sisyanov**
İyirmi ikinci şəkilBöyük ipək çadır. İbrahim xan və Ağabəyim ağa.*İbrahim xan**
İyirmi üçüncü şəkilVanyanın evi. Vanya güzgü qabağında özünü keşiş qiyafəsinə salır. Haykanuş gəlir.*Haykanuş**
Başqa şairlərin şeirləri
Edər hər qəmzədən məqtul yüz canı qara gözlər,Salıbdır mərdüm içrə gör nə qovğanı qara gözlər.
BilməyəOl deyil şair ki, şeirin ehtiramın bilməyə,Dəvayi-şeir eyləyə, amma məqamın bilməyə.
ÇayŞiveyi-əhli-zamanə bəzmi-qəndü çaydırKimsədə əndazə yox, hər kimsənə xudraydır
Yar məniBir söz ilə mən duzağa tutuldum,Bu qərib ellərdə yaxdı yar məni,