Страница 2 из 5 · 20%

Yaxındadır, di tez get. Mən bu skamyanın üstündə oturub, səni gözləyirəm.

İnci

Yaxşı, bu saat... (Çıxır)

Mürşüd içəri girir.

Mürşüd (Heç bir tərəfə baxmadan, gəlib əvvəlki yerində oturur. Bir qədər sükutdan sonra)

Bəs sən Nəsirov yoldaşın dalınca getməmisən? Burada oturub qəm dəryasına qərq olmaqdan nə çıxar?

Gülər

Siz mənimləsiniz?

Mürşüd (dik qalxır)

Oy, bağışlayın, mən sizi səhv salmışam. Mənim yoldaşım bayaqdan burada oturmuşdu, elə bildim ki, yenə odur, bağışlayın. Dərd məni o qədər çaşdırıb ki, ağnan qaranı seçə bilmirəm.

Gülər

Dərd çəkən sizsiniz, yoxsa yoldaşınız?

Mürşüd

Yoldaşım da dərd çəkir, mən də dərd çəkirəm. Bağışlayın, mən sizi istirahətdən ayırdım. Ancaq icazə verin, burada oturub gözləyim. Yoldaşımla sözləşmişik ki, burada görüşək.

Gülər

Oturun, nə olar ki... Mən də burada yoldaşımı gözləyirəm.

Mürşüd

Həyat yoldaşınızı?

Gülər (hirsli halda)

Onun əhəmiyyəti yoxdur!

Mürşüd

Yoxdur, yoxdur! Mən bir söz demirəm ki! Papiros çəkmək olar?

Gülər

Gah dərd çəkirsiniz, gah papiros çəkirsiniz. Siz nə qəribə adamsınız?

Mürşüd

Demək, papiros çəkməyə icazə vermirsiniz?

Gülər

Mənə nə var axı?.. İstəyirsiniz lap qəlyan çəkin. Mənimlə danışmayın, vəssalam!

Mürşüd

Sözüm yoxdur ki. (Papiros yandırır)

Gülər

Heç bilmirəm hər adamı niyə bu bağa buraxırlar? Bu, istirahət evinin bağıdır, camaat gəzmək istəyirsə, getsin bulvara.

Mürşüd

Siz mənimləsiniz?

Gülər

Yox, mən öz-özümə danışıram.

Mürşüd

Öz-özünüzə daha niyə mənim haqqımda danışırsınız? (Hirslənib papirosu atır)

Gülər (kinayə ilə)

Papiros kötüyünü yerə atmağınızdan məlum olur.

Mürşüd

Nə məlum olur?

Gülər

Məlum olur ki, nə qədər də təmizliyi sevən adamsınız. Yazıq sizin arvadınızın gününə!

Mürşüd

Mənim arvadım yoxdur, subayam.

Gülər

Məni heç maraqlandırmır da. Nə borcuma!

Mürşüd

Amma yəqin sizin yoldaşınız lap xoşbəxtdir!

Gülər (hirsli halda)

Mənim də yoldaşım yoxdur!

Mürşüd

Yoxdur, yoxdur! Mən bir söz demirəm ki!

Gülər

Yoxsa hələ bir söz də demək istəyirdiniz.

Mürşüd

Bağışlayın, siz hamı ilə bu cür top-tüfənglə danışırsınız?

Gülər

Məcbur eləməsələr, danışmaram.

Mürşüd

Mən sizi məcbur eləmişəm?

Gülər

Siz yox, eləyənlər olub.

Mürşüd

Yaxşı, başqalarının acığını məndən niyə çıxırsınız? (Öz-özünə) Bəs bu Sadıq niyə gecikdi?

Gülər

Nə Sadıq? Yoxsa, siz burada Sadığı gözləyirsiniz?

Mürşüd

Sadığı gözləyirəm. O yazıq da mənim kimi düşmüşdü bir cəncəl arvadın əlinə, güclə yaxasını qurtardı.

Gülər

Necə? Siz mənə cəncəl deyirsiniz?

Mürşüd

Deməli, siz Sadığın yoldaşısınız? Üzr istəyirəm, cəncəl sözünü təsadüfən dedim. İcazə verin, tanış olaq. Sizin yoldaşınız Sadığın sadiq yoldaşı...

Gülər

Mənim keçmiş yoldaşımın... (Hirslə ayağa qalxır) Heç o cür adamın adını mənim yanımda çəkməyin.

Mürşüd

Sadığın yoldaşı keçmiş olsun, keçməmiş olsun, mənim bacımdır. Bilirsiniz, bacı, Sadıq kimi oğlan dünyada bir dənədir.

Gülər

Xahiş elədim ki, ondan danışmayın. Ailə qurmağın, ailə səadəti yaratmağın əleyhinə olan bir adam nəinki mənim, heç bir qadının əri olmağa layiq deyil. Yəqin onu xarab eləyən də sizin kimi subay yoldaşlardır.

Mürşüd

Bağışlayın, mənim subaylığımın tarixi cəmisi bir neçə saatdır.

Gülər

Subaylıq nədir ki, hələ onun tarixi ilə də məşğul olursunuz?

Mürşüd

Deməli, təqsirlərin hamısı mənim üstümdə qaldı? Bağışlayın, Sadıq arvadını boşayıb, mən neyləyim?

Gülər

Mən bilirəm ki, onu yoldan çıxardan sənin kimi yoldaşlarıdır.

Mürşüd

Mən onun ən yaxın dostuyam, bacı, yaxın dost öz yoldaşını yoldan çıxartmaz.

Gülər

Mən hamısını yaxşı bilirəm.

Danışa-danışa çıxırlar. İnci ilə Sadıq gəlir.

Sadıq

Deməli, bacı, Nəsirov yoldaş gedib?

İnci

Bəli, mən onun maşınla getdiyini gördüm.

Sadıq

Deməli, bacı, sizin dediyinizdən belə çıxır ki, Nəsirov yoldaş material dalınca gedib?

İnci

Xeyr, mən elə söz demədim, çünki nə dalınca getdiyini bilmirəm.

Sadıq

Bağışlayın, bir az fikirliyəm. Siz burada bir nəfər görmədiniz ki?

İnci

Görməmişəm. Mənim də burada bir rəfiqəm vardı, elə buradaca oturmuşdu.

Sadıq

Yox. Rəfiqə adlı arvad mən heç tanımıram.

İnci

Adı Rəfiqə deyil, Gülərdir.

Sadıq

Nə? Gülər? Amandır, adını çəkməyin, gələr.

İnci

Siz Gülərdən niyə qorxursunuz ki?

Sadıq

Necə qorxmayım? Bəs mənim başıma gələn bütün işlərin səbəbi Gülər deyil? Gecənin qaranlığında qapı-qapı gəzib pənah aparmalı bir yer axtarıram, hamısının səbəbi o deyil? (Öz-özünə) Bir odur, bir də ki, o uşaq...

İnci

Deməli, siz Gülərin yoldaşısınız?

Sadıq

Yoldaşı deyəndə... bir az düz gəlmir... sabiq yoldaşıyam.

İnci

Sevinirsiniz?

Sadıq

Bəs necə? Heyf deyil subaylıq? Açıq hava, açıq ürək. Spiçkanız var?

İnci

Heç qadında spiçka olar?

Sadıq

Düzdür, səhv eləmişəm, qadınlar spiçkasız da yandırırlar.

İnci

Mən Gülərin sizin kimi əri olduğunu bilmirdim. Heç sizin kimi mədəni, qabiliyyətli kişi də arvadı özündən incidər?

Sadıq

Axı məndə nə təqsir var, bacı? (Öz-özünə) Heç bilmirəm, bu Mürşüd harada qaldı.

İnci (kəskin)

Mürşüd kimdir?

Sadıq

Necə bəyəm, bacı, siz Mürşüdü tanıyırsınız? Mürşüd, ipək kimi bir oğlandır.

İnci

İpəyi korlamayın. Mürşüdün ipəklə yan-yana durmağa haqqı yoxdur.

Sadıq

Aha, bacı, demək siz də bu cəbhənin mücahidlərindənsiniz?

İnci

Sizin kimi mədəni adamın ağzından belə sözlər eşitmək məni təəccübləndirir. Ailədən qaçmaq, ailə səadətini gecələr skamyalar üstündə keçirməyə dəyişmək bir cəbhə deyil. (Ayağa qalxır) İndi başa düşürəm ki, Gülər nə üçün sizdən dad çəkir. Haqlı imiş.

Sadıq

Yox, bacı, bəlkə sizin məsələnizdə Mürşüdün səhvi var, amma mənim məsələmdə yalnız Gülər müqəssirdir. Axı siz bir fikir eləyin...

İnci (sözünü kəsir)

İş işdən keçəndən sonra fikir eləməyin heç mənası yoxdur. (Çıxır)

Sadıq (tək)

Deməli, yenə də Gülər haqlı çıxdı, mən müqəssir? Deməli, təqsirlərin hamısı məndə imiş? Yox, dözəcəyəm, ömrümün axırına kimi sözümdən dönməyəcəyəm. Bu gecə mənim ilk subaylıq gecəmdir, subaylıq gecəsi nömrə bir.

Mürşüd gəlir.

Mürşüd

Sadıq! Sənin arvadın mənim abrımı bükdü ətəyimə, saldı yola.

Sadıq (qorxu içərisində)

Bura gəlmişdi?

Mürşüd

Bəs necə?

Sadıq

Amandır, Mürşüd, məni bir yerdə gizlət, rast gəlsəm, istirahət evi bünövrəsindən uçacaq.

Mürşüd

Qorxma, heç vecinə də deyil. Amma mənimki yəqin bu saat gözünün yaşı ilə gül sulayır.

Sadıq

Yox, aşna, sənin yoldaşın bu saat burada idi, səni də, hələ, üstəlik, məni də dünyada nə qədər maddə varsa, hamısı ilə müqəssir elədi.

Mürşüd

Amandır, Sadıq, gəl paltarlarımızı dəyişək, məni tanımasın. Görsə, deyəcək dur dördüncü seansa özümüzü çatdıraq.

Sadıq

Yox, aşna! O, gördüyün deyil. Seansların hamısı qurtarıb. Biz indi öz həyatımızın ikinci seriyasında yaşayırıq.

Mürşüd

İkinci seriya gözümə bir az qaranlıq kimi görünür. Nəsirovu tapdın?

Sadıq

Yox, deyir maşınları götürüb, taxta-şalban gətirməyə gedib.

Mürşüd

Bəs biz neyləyək?

Sadıq

Neyləyək? Mən nə bilim neyləyək! (Skamyanın üstündə uzanır) Deyirəm istəmirəm, deyir yox, mən deyən olacaq, istəyəcəksən, vəssalam! Neynək. Eybi yoxdur, sən deyən olsun!

Mürşüd

Sadıq, Sadıq!

Sadıq

Nə var, ədə, qoysana işimi görüm.

Mürşüd

Nə iş görürsən ki?

Sadıq

Gülərin özü ilə söhbət eləmək mümkün deyil, onun xəyalı ilə danışıram. Deyirəm qoy başı dinc yaşayaq, cığ-bığ nəyə lazımdır? Deyir yox, gərək insan nəslini artıram, neynək, artır da. (Uzanır) Bax, budur, bu mənim yataq otağım, bu çarpayım, bu da qu tükündən balışım. (Çəkməsini başının altına qoyub uzanır) İbtidai insanlar nə kef çəkirlərmiş? Heyf deyil subaylıq! (Yatır)

Mürşüd

Sadıq, bizim arvad məndən çox giley-güzar elədi? O ki, məni o qədər sevir, çətin dözəcək. (Ona yaxınlaşır, yuxuladığını görüb) Bu yatıb ki! Nə olar, eybi yoxdur. Dost yolunda boran olar, qar olar. (Onun üstünü örtür) Mən ölməmişəm ki, budur ey... (Uzanır) Bu cür rahat həyata nə demişəm? Can, ay subaylıq!

İşıq sönür.

Клавиши ← → для перехода, R — случайное стихотворение

Случайное стихотворение

Другие произведения автора

Стихи других поэтов