İkinci pərdə
Страница 2 из 3 · 33%
Milisioner
Mən sizin qadın olmağınıza hörmət edirəm, yoxsa anam...
Dünya
Necə, necə anam?
Milisioner (yumşaq)
Xanım.
Dünya
Get, mən sən deyənlərdən deyiləm.
Milisioner
Bu nə danışır canım. (Dünyaya) Vətəndaş, iftira xanım. (Fit verir.) Karnaval gecəsi el bağını zibillədiyinə görə 3 manat cərimə.
Dünya
Necə, necə, cərimə? Bağ elin, karnaval ərimin, sənə nə hay düşüb? (Tum çırtlayır.)
Milisioner (cibindən dəftərçəni çıxarır)
Onda mən akt bağlamalıyam.
Dünya
Nə dedin? Yenə akt? Görünür dərsin yaxşı verməmişəm. Gözünü aç, mənə yaxşı bax! (Müqəvvanı qaldırır, milisioner onu tanıyıb diksinir.)
Milisioner
Bu sizsiniz?
Dünya
Bəli mənəm. Niyə duruxdun? Bağlasana aktını.
Milisioner (kənara)
Bağışlayın xanım. Bağda təmizlik nümunəsi göstərdiyinizə görə sizə bizim milis idarəsi tərəfindən təşəkkür. (Gülərək gedir.)
Dünya
Vallah məndən nə milis naçalniki çıxar. (İki barmağını ağzına salıb milisionerin dalınca fit çalır.)
Nadir əlində gül, Gülaranı axtararaq gəlir.
Nadir
Bu Gülara hara getdi? Eh qızlar, qızlar!..
Dilavər (gəlir)
Aha, Nadir, niyə bikefsən?
Nadir
Heç...
Dilavər
Yox dostum, dərdini bilirəm, sənə ürəkdən acıyıram.
Nadir
Gülaranı görməmisiniz ki?
Dilavər
Niyə görməmişəm, görmüşəm. Onun əli böyüklər ətəyindədir.
Nadir
Uzatmayın, hardadır?
Dilavər
Bağın tənha bir guşəsində Qorxmazovla şirin-şirin söhbət eləyir.
Nadir
Qorxmazovla?
Dilavər
Bəli, doğrudur, Qorxmazov bizim dostumuzdur, amma nişanlı bir qıza yaraşmaz axı. Götürək elə bu uşaq məsələsini...
Nadir
Nə uşaq məsələsi?
Dilavər
Əşi biri deyir səndəndir, o biri deyir özgəsindəndir. O biri də deyir ki...
Nadir
Bu sözü kim çıxarıb, kim?
Dilavər
Uşağın özü, doğrudur hələ uşaq dil açmayıb, ancaq onu saxlayanın min dili var.
Nadir
O kimdir?
Dilavər
Dəmirov.
Nadir
Sizin başınıza hava gəlib nədir, bu uşaq söhbəti hardan çıxdı, canım?!
Dilavər
Qorxmazovun otağından.
Nadir
Əl çəkin yaxamdan.
Dilavər
Biz əl çəkirik, lakin uşaq əl çəkməyəcək. (Gedir.)
Nadir
Uşaq nədir? Bu sözlərin mənası nədir? Niyə Gülaranın haqqında belə söhbətlər olsun axı. Təqsir özündə. Kim bilir bəlkə, burda həqiqətə yaxın bir şey var, varsa onda eh...
Gülara (tələsik gəlir)
Nadir, hardasan, bayaqdan səni axtarıram.
Nadir
Məxfi söhbətinizi qurtardınızmı?
Gülara
Kiminlə?
Nadir
Qorxmazovla.
Gülara
Bu nə sözdür?!
Nadir
Sözdür də...
Gülara
Boş sözdür. Görmədin iclasda ona nə toy tutdum.
Dəmirov (gəlib ağac dalından onlara qulaq asır. Kənara)
Qulaqlarım da tutulmağa vaxt tapdı. (Qulağını ovur.)
Nadir
Mən bir neçə dəfə sənə ciddi demişəm ki, ondan uzaq, uzaq...
Gülara
Mən ondan necə uzaq ola bilərdim ki, o hələlik...
Nadir
Əlbəttə uzaq ola bilməzsən, çünki bağlar möhkəmdir.
Gülara
Sən uşaq olmusan nədir?
Nadir
Bəli, uşaq olmağına olub, ancaq atası mən deyiləm.
Gülara
Nə ata, nə uşaq?
Nadir
Sən yaxşı bilirsən. (Əlindəki gülü yerə çırpıb gedir.)
Gülara
Heç başa düşmürəm nə olub. Nadir, bir dayan! (Dalınca gedir.)
Dəmirov gülü yerdən götürüb iyləyir,
Qorxmazov, Dilavər, Bayramalı gəlir.
Qorxmazov
Adə, Dəmirov, Dünya bu aralarda yoxdur ki?
Dəmirov
Xeyr... görməmişəm.
Qorxmazov
Qorxuram bu qəşəng gecəni mənə haram eliyə.
Dəmirov
İndicə Gülara ilə şekilçəkən cavan...
Qorxmazov
Qarğaturist?
Dəmirov
Hə, hə, bu ağacın altında.
Qorxmazov
Aha, öpüşürdülər?
Dəmirov
Xeyr a... vuruşurdular.
Qorxmazov
Nə üstə?
Dəmirov
Uşaq üstə.
Qorxmazov
Sonra, sonra?
Dəmirov
Şey, Nadir dedi ki, uşağı al boynuna. Gülara almadı və Nadiri qovdu. Sonra o dedi ki, bu gülü mənim tərəfimdən verərsən Qorxmazova.
Qorxmazov (gülü qoxulayır)
Can qısqanclıq, can! Afərin mənim bu başıma. Gör a... qız birdən nə dəyişdi. Məndən zəhləsi gedirdi. İndi mənə gül göndərir. Can! Can!
Dilavər
Bütün bunlar nazdır, naz!
Qorxmazov
Deməli, cananın mənə axotu var?
Dilavər
Bəli, var. Çün piş əz vaxt bərayi-məlumat, sizi möhkəm tənqid etməsi də nazdır, naz!
Bu deyil tənqidi-şəxsi, bu olur tənqidi-nazi,
Məni qoyma, ey gözəl qız, o camalına tamarzı.
Odur, müqəvvafüruş xanım gəlir.
Qorxmazov
Maska satan qız? Deyirsən biz də maskalanaq?
Dilavər
Əlbəttə, bərayi-ehtiyat...
Qorxmazov
Ay qız, maskaları bura gətir görək. (Qız gəlir.) Hansını taxsam yaxşıdır?
Qız
Maskalar püşk ilə satılır.
Qorxmazov
Qoy elə olsun, ya bəxt! (Torbadan nömrə çıxarır.) Nömrə 7-ni ver.
Qız (ona ayı müqəvvası verir)
Buyurun!
Qorxmazov
Boyunu yerə soxum belə bəxt! (Hamı maska taxır. Musiqi çalınır.) Mən ölüm ora baxın, yenə aləm qarışdı bir-birinə.
Rəqs edənlərin arasında bir qız oxuyur.
Canan! Bütün aləm bilir eşqimdə düzəm mən,
Məndən uzaq olsan belə üstündə gözəm mən.
İşdir sən əgər özgəni sevsən, onu bil ki,
Od parçasıyam, yandıraram, sanki közəm mən.
Gördüm səni qarşımda dünən, söylədim ey bəxt
Alqış sənə cananla yenə üzbəüzəm mən.
Sənsizliyi az bilmə, gülüm rəngimə bir bax,
Hicranın ilə gör necə solğun bənizəm mən.
Yox, yox, dözərəm dərdinə, hicranına canan,
Hicran seli neylər mənə, coşqun dənizəm mən.
Gəl sanma özün tək bu Süleymanı vəfasız,
Qarşında yenə körpə uşaq tək təmizəm mən!
Dünya Nadirlə söhbət edə-edə gəlir.
Dünya
Sözümü kəsmə, mənə qulaq as, zəmanə yaman dəyişib. Biz də qız olmuşuq, belə qələtlər eləməmişik... Ərimin pamoşniki Gülaranı deyirəm ey... Kişini yoldan eləməyib?
Nadir
Buraxın bu dolaşıq söhbətləri.
Dünya
Bizi dolaşığa o salıb... gecə yarıya kimi evimizə zəng olur.
Nadir
Nə dediniz? (Fikri dağınıqdır.)
Dünya
O gecə yuxusunda Gülara, Gülara deyib gur-guruppaz kravatdan endi yerə... Mən də nə yemisən – turşulu aş, o ki döyməliydi döydüm onu. İndi də bütün aləm deyir ki, bir bala doğub verib Dəmirovgilə saxlamağa... Guya körpəni Dəmirovun əliuşaqlı gəlini əmizdirir.
Nadir
Uşaq?! Dəmirovgildə!..
Dünya
Hə, hə, başına çarə qıl, cavan oğlan!
Nadir (pərişan)
Çarə, əlbəttə çarə. (Dağınıq fikirli yavaşdan bu şeri deyir)
Bir körpə uşaq tək məni əyləndirib oynat,
Aldat məni, aldat məni, aldat məni, aldat.
Mən könlümü verdim sənə, heyhat! Dedin azdır.
Rüşvət deyil əlbəttə könül, sən məni azdır.
Hər doğru sözüm oldu yalan söz nəzərində,
Aldandın əzizim yenə sən öz nəzərində.
Vaxtilə tutardın məni dünyalara üstün,
Anlat mənə, məndən niyə qaçdın, niyə küsdün?
(Gedərkən Dünya gəlməkdə olan Gülaranı görüb Nadirə süni mehribanlıq göstərir.)
Gülara
Mən nələr görürəm!
Dünya
Gedək, Nadir, sənə sözüm var.
(Gedirlər.)
Gülara
Gedin, artıq mən sizə mane olmuram.
Mən söyləmərəm boş yerə cananə vəfasız,
Axır məni saldın yenə sən qanə, vəfasız,
Var məndə vəfa, səndə, gülüm, zərrə vəfa yox,
Gəl söyləmə sən bir də Gülaranə vəfasız.
Qorxmazov (tələsik gəlib özünü Gülaraya yetirir)
Ay qız!
Gülara (diksinir.)
Bıy, bu kimdir?
Qorxmazov
Napras yerə qorxursan, mənəm, Qorxmazov.
Gülara
Çəkilin... rica edirəm.
Qorxmazov
Gülara, daha bağışlayıram səni. (Gülü iyləyir.) Sənin tənqidinin mənasını indi başa düşürəm.
Bu deyil tənqidi-şəxsi, bu olur tənqidi-nazi,
Məni qoyma, ey gözəl qız, o camalına tamarzı.
Gülara
Deyəsən tənqid sizi şair eləyib.
Qorxmazov
Bəs nə, bu gül məni bir sayaq eləyib ey...
Gülara
Təbiətin sirri böyükdür.
Qorxmazov
Təbiət, məhəbbət... Deməli siz də sevirsiniz...
Gülara
Əlbəttə sevirəm, bu gizli deyil. Lakin vəfasız məni...
Qorxmazov
Vallah mən də sevirəm, vəfasız zad deyiləm. Bir hə de, gör səninçin neyləyirəm, nə!..
Gülara
Ona nə edə bilərsən ki?
Qorxmazov
Qovaram eşqimizə meşat eləyən biganələri.
Gülara (gülür)
Mən nə hayda, siz nə hayda...
Qorxmazov (fikirləşir)
Belə sənin maskanı yeyim, maskanı... Gülara, özün görürsən ki, rəhbərliyi necə bacarıram. Ancaq bu şoqərib qalstuk bağlamağı bacarmıram ki, bacarmıram. (Cibindən bir qalstuk çıxarır.) Al keçirt boynuma, bağla məni...
Gülara (başını bulayıb gülür)
Ver görüm. (Qalstuku Qorxmazovun boynunda bağlayır.)
Nadir (gəlir)
Bağışlayın, mane oldum.
Qorxmazov
Çalağanturist!
Gülara
Yoldaş Qorxmazov, rica etdi qalstukunu bağlayım.
Nadir (əsəbi)
Bərk bağla, qırılıb əlindən qaçmasın. (Gedir.)
Qorxmazov
Adə, heyvan-zadam ki, kəndiri qırıb qaçam?! (Gülara Nadirin dalınca getmək istərkən Qorxmazov əlindən tutub dartır.) Bivəfadır, qoy getsin! Gəl oynayaq, gör nə qəşəng havadır. Bunu yazanın barmaqlarına əhsən!
Kitabxana.az · https://kitabxana.az/ru/works/suleyman-rustem-geldi-geder-ikinci-perde
Клавиши ← → для перехода, R — случайное стихотворение
Другие произведения автора
Стихи других поэтов
Sevdim bir cavan on dörd yaşındaO tərfə çağına qurban olduğum
Dərbəndə gəlSalam olsun sənə, ey aşiq Valeh,Hünərin var isə bu Dərbəndə gəl,
Edər hər qəmzədən məqtul yüz canı qara gözlərEdər hər qəmzədən məqtul yüz canı qara gözlər,Salıbdır mərdüm içrə gör nə qovğanı qara gözlər.
ƏzizimƏzəl səni sevdim, sonra ayrıldımOldu mənə müşkül hallar əzizim