Содержание
  1. Doqquzuncu şəkil
  2. Onuncu şəkil
  3. On birinci şəkil

Страница 2 из 3 · 33%

Mürsəl

A koxa, nə yaman uzunmuş dilin...

Koxa

Məni ləngitməyin, nə oldu cavab?

Mürsəl

Bir az səbrini bas, mirzə qozqurab.

Koxa

Cavabı bu qədər uzatmaq olmaz!

Mürsəl

Qorxma, ağaların cavabsız qalmaz.

(Düşünür və əlini belindəki qayçıya atır.)

Koxa

Siz cavab axtarın, mən də əyləşim,
Bir əməlli-başlı bığımı eşim.

Mehdi

Buyur, burda əyləş, a koxa lələş.

(Onu bir daş üstündə oturdur.)

Mürsəl, gəl, koxanın bığlarını eş!

Mürsəl

Görüm ki, canını dərd, azar alsın,
Süpürgə bığların soxaya qalsın.

(Koxanın bığlarını kəsib ovcuna basır.)

Canın rahat oldu? Bax, cavab budur,
Al, bu da bir cavab, şıllaq atma, dur!

Koxa

Gec-tez alacaqlar bu heyfi sizdən.

Vəli

Bir anbar salam de bəylərə bizdən.
De ki, aldanmadı sözə qaçaqlar,
Onlar yuvanıza od vuracaqlar.

Koxa

Baş üstə...

Koxanı dolayaraq yola salırlar.

Nəbi

Sağ olun, qəhrəmansınız.

Tapdıq (Yüyürərək gəlir.)

Nəbi...

Nəbi

Nə xəbər?

Tapdıq

Odur üç nəfər
Dırmanır dağa.

Nəbi

Mehdican, yoxla.
Gör kimdir gələn.

Mehdi

Öyrənərəm mən.

(Gedir.)

Nəbi (Qaçaqlara)

Qardaşlar, aldığım xəbərə görə,
Üç naçalnik çıxıb bu gün səfərə.
Min atlı göndərib dağlara sarı
Tiflisin general qubernatoru.

Vasili

Qaçaqlar çörəyi burnuna yemir,
Buyurub gəlsinlər, dənlərik bir-bir.

Bu zaman Alı kişi iki kəndli ilə pərişan halda gəlir.

Nəbi

Ata... Nə üz verib?

Alı

Qurbanın olum,
Sən dözə bilməzsən bu dərdə, oğlum!
Dərdim var sinəmdə uca dağ kimi,
Yenə dayanmışam qoca dağ kimi.

Nəbi

Söylə...

Alı

Kəndimizi tutdular topa,
Başını itirdi bütün el-oba.
Dedilər, Nəbini tez verin bizə! Əgər verməsəniz qan çıxar dizə.
Gərək görəydiniz namussuzları,
Saçından sürüyüb bizim qızları
Aparıb, getdilər qənimət deyə,
Haqqı tapdadılar həqiqət deyə.
Ucaldı göylərə oddan ləpələr,
Yandı beşiklərdə dilsiz körpələr.
Allahı köməyə çağırdıq, Allah
Bizi eşitmədi, dilim gəlmir, ah...

Nəbi

Bəs anam?

Alı

Soruşma.

Nəbi

Nə dedin? Necə?

Alı

Bütün varlıq dönür gözümdə heçə.

Nəbi

Vuruldu qəlbimə yeni bir yara.
Dünya gözlərimə görünür qara,
Nələr eşidirəm...

Alı

Pərvərdigara!..
Məni öldürəcək bu ağır yara.

Nəbi

Qıydılar canına, ana, can ana!
Qardaşlar, siz deyin, kim dözər buna?!

Mehdi

Ana, yazıq ana, bağışla məni,
Qoruya bilmədim yağıdan səni.
Yanında olsaydım dönüb aslana
Sənin cəlladını boyardım qana.

Nəbi

Ana dərdi, vətən dərdi, el dərdi
Yaralı bağrımı qana döndərdi.

Alı

Gəl, basım bağrıma, balacan, səni,
Xilaskar doğubdur bu dövran səni.
Çox bəlalar çəkdin cavan yaşında,
Əlin titrəməsin haqq savaşında!

Həcər

Nəbican, başını dağ kimi dik tut.
Gözünün yaşını kininlə qurut!

Nəbi

Ana, and içirəm ruhuna bir də,
Mən sənin qanını qoymaram yerdə!

İşıq sönür və yanır. Hamı yatmış. Nəbi sıldırım qayanın başında dayanıb ətrafı seyrə dalmışdır. Həcər ağır addımlarla gəlir. Nəbi xəyal aləmindən ayılır.

Həcər

Nəbi, yatmamısan?

Nəbi

Bu vaxtda yatmaq!
Kim bilir, sabaha kim sağ çıxacaq,
Başımız üstündə tutmuşdur qərar
Yenə qan-qan deyən qara buludlar.
Onu yox etməsək qan bahasına
Bir xitam verilməz elin yasına.

Həcər

Yox, boyun əymərik versək də qurban!
İgid üstünlüyü qazanmır asan.

Nəbi

Hər qurban verdikcə alışır sinəm,
Dolanır başıma bütün bu aləm.

Həcər

Nəbi, qadan alım, bu sınaq günü
Qara fikirlərlə yorma özünü.

Nəbi

Düşünüb bayaqdan tökmüşəm tədbir,
Gərək sinə gərək düşmənə əlbir!
Azadlıq yolunda şərəfdir gerçək
Min dəfə dirilib, min dəfə ölmək!

Həcər

Gəl basım bağrıma, Nəbican, səni,
Təzədən dünyaya gətirdin məni.
Gəl, bir qədər dincəl.

Nəbi

Yox, Həcərciyim,
Ömrümün bəzəyi, gülüm, çiçəyim...
Baxtımın ulduzu, ellər gözəli,
Bir ağ gün görmədin mənə gələli.
Nə gərdənlik taxdın, nə üzük taxdın,
Min kərə ölümün gözünə baxdın.
Ellərin yasında bağlayıb qara,
Özünü vətənçin atdın odlara.
Ulduzlar şahiddir, demirəm yalan,
Gözümsən, özümsən, can sirdaşımsan.
Yenə bardaş qurub ürəyimdə qəm,
Mən sənin yanında xəcalətliyəm.

Həcər

Nəbi, nə deyirsən? Ağıllı danış!
Məgər ürəyimlə deyilsən tanış?
Çıxmışam bu yola öz xoşumla mən,
Durmuşam yanaşı sirdaşımla mən.
Gəl qara günləri gətirmə yada.
Bu ucsuz, bucaqsız dərdli dünyada
Ağlayaraq birgə, gülərik birgə.
Yaşayırıq birgə, ölərik birgə...

Nəbi

Elədir, gözəlim, canım, ciyərim,
Ürəyi qar kimi ləkəsiz pərim.
Seyr edib vətəni, deyirəm artıq
Günəşli günlərin qarşısındayıq!

Vasili (Tələsik gəlir.)

Nəbi, Nəbi!

Nəbi

Nə var?

Vasili

Gəldim xəbərə.
Qaynayır qazantək yenə dağ, dərə,
Yolların üstünü alıb tozanaq,
Çapır üstümüzə bir sürü qazaq.

Qəhrəman (Gəlir.)

A Nəbi, qazaqlar yaxınlaşdılar,
Sel kimi, yel kimi dağı aşdılar.

Nəbi

Eşidin əmrimi, yatın səngərə,
Gülləni atmayın boş, nahaq yerə!

Vəli

Düşmən üç tərəfdən eləyir hücum.

Nəbi

Həcərim, yubanma, sol səngərə cum!
Sənə tapşırılır, Vəli, sağ tərəf,
Dostlar, hamınıza bəllidir hədəf.
Əvvəl başçıları alın nişana,
Döndərin onların bağrını qana!

Mehdi

İgidlər, irəli dalımca gəlin!
Yağının bağrını xəlbir tək dəlin!

Atışma başlanır. Mehdi vurulur.

Aman, Nəbi, ata...

Alı (Onun başını dizi üstə alır.)

Kim vurdu səni?

Mehdi

Anamın yanında basdırın məni.

Alı

Ey fələk, gülmədim sayəndə bir an,
Qubarım dağlardan böyükdür mənim.
Dərdimin üstünə dərd qoydu zaman,
Belimi sındıran bu yükdür mənim!

Nəbi (Siyirməqılınc özünü qardaşının üstünə atır.)

Qırıldı Nəbinin qolu, qanadı,
Aman, ürəyimin başı qanadı.
Sən ki, qartalıydın bizim dağların,
Nə üçün yumuldu göz qapaqların?!

Vasili

Düşmən zor göstərir dörd bir tərəfdən...

Nəbi

Gəlirəm, gəlirəm, ölməmişəm mən!

Pərdə

Клавиши ← → для перехода, R — случайное стихотворение

Случайное стихотворение

Другие произведения автора

Стихи других поэтов