Birinci pərdə
Содержание
Страница 8 из 8 · 88%
Səkkizinci şəkil
Aslanın xatirəsinin davamı. Yenə həmin otaq. Bir az daha bəzəklidir. Stolun üstündə telefon var. Aslan nə isə axtarır. Telefon zəng çalır.
Aslan (dəstəyi götürür)
Gəlirəm da... Denən pulları banka təhvil verməyib, evdə qoyub, bu saat gətirir. (Dəstəyi yerinə qoyur, şkafları, bufeti axtarmağa başlayır. Saleh içəri girir. Aslan təəccüblə) Sənə kim lazımdır?
Saleh
Şəlalə xanım evdədir?
Aslan
Bu arvad alverçilərə pul səpməkdən yorulmadı da... Mal gətirmisənsə, lazım deyil.
Saleh
Mənə Şəlalə xanımın özü lazımdır.
Aslan
Nəyinə lazımdır?
Saleh
Bu nədir? Sorğu-sual, filan-feşman...
Aslan
Bura bax, sənə bir kəllə gələrəm ki, pəncərədən düz mastavoya sıçrayarsan.
Saleh
Sakit. Nəfəsini dərindən al, bir az saxla, sonra çölə çıxaranda başla saymağa: bir, iki, üç, dörd...
Aslan
Bu nə deyir, ə?..
Saleh
Şəlalə xanım gələndə deyərsən ki, Saleh gəlmişdi. Yadından çıxmaz ki? Saleh. Ayrı heç bir filan-feşman lazım deyil. (Çıxır)
Aslan (öz-özünə)
Deyəsən mən doğrudan dəli oluram. (Telefon zəng çalır, dəstəyi götürür) Hə, ədə, a key, dedim onları başa sal, indicə gəlirəm də... Arvad evdə yoxdur. Bilmirəm istiqrazları hara qoyub. (Dəstəyi asır)
Tərlan xanım içəri girir.
Tərlan xanım
Bonjur!
Aslan
Bu saat mənim borjumluq halım yoxdur. Bir bura gəl...
Tərlan xanım
Mənimlə o tonda danışma ha. Bilirsən mən kiməm?
Aslan
Bilirəm, bilirəm... İsrail bəyin aşnası olmusan. Bir gözümün içinə yaxşı bax, de görüm, Saleh kimdir? İndicə bura gəlmişdi, Şəlaləni soruşurdu.
Tərlan xanım (özünü itirir)
Saleh? Bilmirəm. Hə, Saleh... Şəlalənin əmisi oğludur da.
Aslan
Təzə çıxdı? Bu vaxta kimi bəs hardaydı?
Tərlan xanım
Göndərmişdilər... Yəqin təzəcə qayıdıb. Bəs, Şəlalə özü haradadır?
Aslan
Cəhənnəmdə. On iki imam haqqı bir gün çıxacağam özümdən.
Tərlan xanım
Tu nə vu riyənfər,no!
Aslan
No, no... sənin üzündən bütün Fransaya nifrət eləməyə başlamışam.
Tərlan xanım
Heyf o boyda ölkədən... Bilsələr özlərini həlak eləyərlər.
Şəlalə içəri girir.
Tərlan xanım (onun qulağına)
Ərin əlindən yığıb. Ehtiyatlı ol.
Şəlalə
Pişik, nə olub, hirslənmisən, fi-fi?!
Aslan
Fi-fi nədir, az? Ərinlə danışanda adam kimi danış!
Şəlalə
Pişik! Tez ol gəl, ayaqqabılarımı çıxart!
Aslan
Ayaqqabılarını yox, ciyərini çıxardacağam. Ancaq bir az sonra. İndi əlimdə ayrı işim var. De görüm, Saleh kimdir?
Şəlalə
A... Bibim oğlu.
Aslan
Əmioğlu dönüb oldu bibioğlu?
Tərlan xanım
Həm əmisi oğludur, həm də bibisi oğlu. Qohum qohumu alıb da.
Aslan
Ey, Fransa kralı, sən yum, mən arvadımla danışıram. (Şəlaləyə) Sənin əmin oğlu ilə bibin oğlunu bir-birinə qatıb smes eləyəcəyəm... İstiqrazlar hardadır?
Şəlalə
Nə?
Aslan
Üçfaizli istiqraz!
Şəlalə (çiyinlərini çəkib deyir)
Sa-ne-vu zeentrespa!
Aslan
Nə, nə? Sən də başladın firəngcə danışmağa?
Şəlalə
Yəni, yaxşı eləyib xərcləmişəm, sənə nə?
Aslan
Xərcləmisən? Mənim maaşım bəs olmuyub? Su köşkünün gündəlik gəlirini banka verməyib sənə gətirmişəm, bəs olmuyub? Özüm köhnə ayaqqabıda, yırtıq köynəkdə gəzib sənə gündə üç cürə paltar geyindirmişəm, bəs olmuyub? Təqsir səndə deyil, bax bu ilandadır. (Tərlan xanımı göstərir) Bu ilan səni yoldan çıxartdı.
Tərlan
Ey, ey, qadınları təhqir eləmək olmaz.
Aslan
Birinci gündən sənin, sən ilanın başını əzsəydim... İndi daha gecdir. İndi daha mənim öz başım ələ keçib. Çıx buradan bu saat, səni gözüm görməsin, çıx!
Tərlan xanım (Şəlaləyə)
Az, dur dəlixanaya zəng elə!
Şəlalə
Xala, get, gör Saleh nə oldu? Bibioğlu məndən ötrü darıxıb.
Tərlan xanım
Sənə yazığım gəlir, ay bala, bu cür vəhşi ilə yaşamaq olar?
Gedir. Aslan həyəcan içərisində gəzinir. Şəlalə Tərlan xanımı ötürüb qayıdır. Ayağını ayağının üstünə aşırıb divanın üstündə oturur.
Aslan (Şəlaləyə yaxınlaşır, pıçıltı ilə)
Köşkü yoxlayırlar, əskiyim var. Başa düşdün?
Şəlalə
Suyun çatmır, bir vedrə evdən apar...
Aslan
Su yox, pul çatmır, bilirəm, varındır, ver!
Şəlalə
Məndə pul haradandır? Gətirdiyini özünə xərcləmişəm. Yediyin yadından çıxıb?
Aslan
Şəlalə, ağız, səndə ürək yoxdur? Mənə yazığın gəlmir? Dur, dur yığışdır paltarlarını, ayaqqabılarını satmağa aparıram. (Telefon zəng çalır) Telefona cavab vermə, paltarlarını hazırla, onları sakit eləyib, qayıdıram. (Gedir)
Şəlalə (dəstəyi götürür)
Allo! Kimdir? Aha, Saleh yoldaş, sizsiniz? Qonşumuzun oğlu gəldiyinizi mənə xəbər verdi... hə, hə... mən sizə demədim? Doqquz bedir də... Dəniz kənarında məni gözləyin, gəlirəm. (Dəstəyi asır, tez paltarlarını şkafda gizlətməyə başlayır)
Tərlan xanım içəri girir.
Tərlan xanım
Neyləyirsən?
Şəlalə
Dedi ki, paltarlarını aparıb satacağam, gizlədirəm.
Tərlan xanım
Gizlətmə, apardılar.
Şəlalə
Hara apardılar?
Tərlan xanım
Gedər-gəlməzə. Pul yediyi üçün tutdular.
Şəlalə
Xala, səni görüm, xoşxəbər olasan.
Sevindiyindən oynamağa başlayanda pərdə düşür.
Kitabxana.az · https://kitabxana.az/ru/works/sabit-rehman-yalan-birinci-perde
Клавиши ← → для перехода, R — случайное стихотворение
Другие произведения автора
Səkkizinci şəkilBakının küçələrindən biri. Əlibaba ilə İmamqulu Kəblə Muxtarı gətirib güclə bir daşın üstündə oturdurlar.*
Əliqulu evlənir4 pərdə, 5 şəkildə*İştirak edənlər
Birinci pərdəBirinci şəkilPərdə qabağı. Sol tərəfdə telefon budkası, sağda ağac və skamya. Bunlar sona qədər bu cür qalır.*
İkinci pərdəİkinci şəkilYasəmən əlində bir dəstə çiçək pərdə qabağına çıxır.*