İkinci pərdə
Содержание
Страница 3 из 5 · 40%
Roza
Nə olub ki?
Firuzə
Səhərdən Alagözün ağlamağından evi sel aparırdı. İndi, sən ona neylədin ki, dişlərini yığa bilmir?
Roza
Mən onu başa saldım ki, bu gün yeni bir dünyaya daxil olur. Belə bir gündə sevinməyən qız olar?
Firuzə
Sevinirsən, az?
Alagöz
Sevinirəm, ana can, qoy səni öpüm, söysən də, acıqlansan da, yenə anasan, anadan ayrılmaq çətindir.
Firuzə
Az, niyə ayrılırıq? Oyan-buyan olar, kürəkənimi də gətirərəm yanıma, bir yerdə yaşayarıq. Atanın dövlətini bütün Bakı yesə qurtarmaz.
Alagöz
Çox sağ ol, anacan, de görüm, mənim ərimi çox istəyəcəksən?
Firuzə
Az, bəsdi, a, a, biabır olduq! Urusa qoşulmaq belədir də, bir dəqiqənin içində qızın üzü sırtıldı.
Roza
Niyə elə deyirsiniz, Firuzə xanım, mən ona pislik eləyirəm?
Firuzə
Zarafat elədim, ey!.. Axşama qalarsan ha, nişana...
Roza
Xeyr, evə getməliyəm. Bir dəqiqə gecikəndə anam döyür.
Firuzə
Əcəb eləyir. Qızını döyməyən dizini döyər. Yaxşı, sağ ol. Tez-tez gəl bizə, səndən xoşum gəldi.
Gedir.
Roza
Tez Pərvizə xəbər göndərmək lazımdır. Bu evdə inandığımız bir adam varmı?
Alagöz
Var. Nökərimiz Rəcəb. Pərvizi tanıyır. Ondan mənə neçə dəfə məktub gətirib.
Roza
Elə isə çağırın o Rəcəbi, tez olun. Gecikmək olmaz.
Alagöz çıxır. Rəcəblə qayıdır.
Alagöz
Rəcəb, mənim xətrimi çox istəyirsən?
Rəcəb
Yenə soruşdu. Əlbəttə çox istəyirəm, matişgənin yanında açıq danışa bilərəm?
Alagöz
Matişgə nədir? Ayıb deyil? De ki, Roza xanım.
Rəcəb
Roza xanım, and olsun Kərbəladakı ağalarımızın qəbrinə, bu evdə bir adam varsa o da mənim bu xanımımdır. Desə öl, ölməsəm Quran belimdən vursun.
Roza
Nə istəyirsiniz? Bu da onun proqramı.
Alagöz
Bu saat Roza xanım sənə bir ünvan deyəcək, ora gedə bilərsən?
Rəcəb
Səndən ötrü dünyanın o başına gedərəm.
Roza
Dünyanın o başı lazım deyil. Dağlı məhəlləsinə get. Orada bir baqqal dükanı var, tanıyırsan?
Rəcəb
Tanıyıram, niyə tanımıram? Bir dəfə o dükandan meyvə almışdım, qurdlu çıxdı, Firuzə xanım belimə təpiyi elə vurdu ki...
Alagöz
Yaxşı, yaxşı, səndən tarix soruşan yoxdur.
Roza
Həmən baqqal dükanının üstündə, ikinci mərtəbədə bir adam yaşayır, adı Kazımdır.
Rəcəb
Kazım.
Roza
O Kazımı taparsan, yavaşdan deyərsən ki, mən Pərvizi görmək istəyirəm.
Rəcəb (hırıldayır)
Pərviz dadaş gəlib?
Alagöz
Sus... yavaş danışa bilmirsən?
Roza
O səni aparacaq Pərvizin yanına. Pərvizin qulağına pıçıldayarsan: Alagöz xanım deyir, bu gecə...
Rəcəb
Dalını deməyim?
Roza
Ayrı heç bir söz lazım deyil. Yalnız bunu deyərsən: “Bu gecə”.
Rəcəb
Alagöz xanım deyir ki, bu gecə, bu gecə nəmənə?..
Alagöz
Daha orası sənə borc deyil.
Rəcəb
Necə borc deyil? Bə mən?
Alagöz
Necə yəni “bə mən?”
Rəcəb
Pərviz dadaşa deyim “Bu gecə”. Sonra evimizdə gözəl bir quş var, pırr eləyib uçsun, onda bə mən?
Alagöz
Sən də qalarsan ağanın, xanımın yanında.
Rəcəb (birdən papağını yerə çırpıb hönkürür)
Xanım, fırfıra kimi başına dolanım, ayağının altını yalayım, məni burada qoyub getmə, dərimə saman təpərlər, yazığam.
Alagöz
Dur ayağa, axmaq, səs salma!
Roza
Səni də aparsa, gedərsən?
Rəcəb
Gedərəm, niyə getmirəm?
Roza
Bəs heç soruşmursan hara?
Rəcəb
Hara aparsalar bu evdən yaxşı olar.
Alagöz
Di tez ol.
Rəcəb
Söz verirsən ki, məni də aparacaqsan?
Alagöz
Söz verirəm.
Rəcəb
Onda gedim. Yaxşı, birdən canavar rast gəlsə, soruşsa, hara gedirsən, nə deyim?
Alagöz
Gözünə görünmə, xəlvətcə aradan çıx. Deyilənlər yadından çıxmayıb ki?
Rəcəb
Deməli, baqqal dükanı, üstündə Kazımın evi. Pərviz dadaşa deyirəm: “Bu gecə”. Çalışım, canavara rast gəlməyim.
Gedir.
Roza
Mən də gedirəm. Gecə görüşəcəyik. Ehtiyatlı ol, yoxsa bütün planlar pozular.
Alagöz
Sağ ol, bacım!
İşıqlar sönür.
Yeddinci şəkil
Kəblə Muxtarın evi. Bəzəkli otaq. Buradan qonaq otağına və yan otağa qapılar var. Kəblə Muxtar həyəcanla pəncərədən boylanır. Firuzə xanım içəri girir.
Firuzə
Oğlan evindən xəbər yoxdur?
Kəblə Muxtar
Yox. Sənin burada nə işin var? Çıx, çıx!
Firuzə
Yaxşı, yaxşı, arvadını yemədilər. Qoy bu açar yerindən baxım. (Baxır) Qonaqların da özün kimi qoca-mocadır.
Kəblə Muxtar
Məni abırdan salma, çıx otaqdan.
Firuzə
Dayan görüm, sən Allah, o Parisdən gələn tacirləri görmək istəyirəm.
Kəblə Muxtar
Hələ gəlməyiblər.
Firuzə
Hələ gəlməyiblərsə deməli heç gəlməyəcəklər. Sənin kimi taciri itirim, gecə-gündüz əlimdə çıraq, axtarım.
Kəblə Muxtar
Firuzə, heç olmasa belə şad gündə məni dilxor eləmə.
Firuzə
Yandırmısan məni, Muxtar, odsuz-alovsuz yanıram. Əşi, özgə tacirlərin arvadları...
Kəblə Muxtar
O barədə sonra danışarıq. İçəri keç, kişi gəlir.
Firuzə (qapıdan baxır)
Kişi deyil, qardaşımdır.
Rəşid Məğrur içəri girir.
Rəşid Məğrur
Kəbleyi, hərarətli salamlar, mənalı kəlamlar, bu mənim ilk şeir kitabımdır. Alagözə hədiyyə gətirmişəm.
Kəblə Muxtar
Ay-hay...
Firuzə xanım
Alagöz üçün əzizdir, ver bura.
Rəşid Məğrur
Bacım, maşallah, günü-gündən gözəlləşirsən, elə bil sən də on səkkiz yaşındasan, Alagözdən seçilmirsən.
Kəblə Muxtar
Qardaşın bacıya eşqnamə oxumağını birinci dəfədir görürəm.
Rəşid Məğrur
Kəbleyi, ilhamım gəlib, şerin qabağında dayanma, bacım, hələ saçların... saçlarınla fəxr edirəm, burax onlar dalğalansın, Xəzər kimi, xar olmasın xəzəl kimi.
Kəblə Muxtar
Bəh, bəh, bəh... Əhsən bu kəlama.
Firuzə
Boyuna bacın qurban, deyirlər, Nəsrullah bəy sənə əlli min manat pul verir?
Rəşid Məğrur
Bacım, axı ki, şerin sərrafı tapıldı. Qəzetim, dünyanın ən böyük qəzeti olacaq. Rəşid Məğrurun qabağında hamı diz çökəcək, iki günə kimi Peterburqdan pullarımı alıram. Kəbleyi, o hesaba yüz manat ver.
Kəblə Muxtar
Pul vaxtı deyil, başım qarışıqdır.
Firuzə
Ondan niyə istəyirsən? Bacın ölməyib, al.
Sinəsindən pul çıxarıb verir.
Rəşid Məğrur (pulu iyləyir)
Uf, nə gözəl qadın qoxusu verir.
Kəblə Muxtar
Əstəğfürullah.
Rəşid Məğrur
Əlimə pul keçən kimi gözüm qaralır, başım fırlanır. Qapı haradadır, qapını mənə göstərin.
Firuzə
Bu otaqda Əlibaba qoçu İmamqulu ilə kart oynayır, get, sən də məşğulat elə.
Rəşid Məğrur
Gedirəm, gedirəm, gözəl bacım!..
Kəblə Muxtar
Firuzə, axırda sən məni müflis eləyəcəksən.
Firuzə
Kəs səsini, xəsis, mənim ora-bura pul səpələməkdən xoşum gəlir.
Hacı ilə Məşədi içəri girirlər. Firuzə xanımı görüb öskürməyə başlayırlar.
Kəblə Muxtar
Çıx get də... görmürsən kişiləri?
Firuzə
Onların kişi sifətlərinə torpaq ələyim. Gətirdikləri hədiyyəyə bax. Çırpasan başlarına.
Gedir.
Hacı
Kəblə Muxtar, oğullu, qızlı olsun, inşallah...
Məşədi
Hədiyyələrimizi qəbul elə. Bax, bu böyüyü mənimkidir, çaşbaş salmayasan.
Kəblə Muxtar
Payınız artıq olsun!
Hacı
Nəsrullah bəylə Əhməd bəy buradadırlarmı?
Kəblə Muxtar
Dallarınca fayton göndərmişəm. Bir azdan buyurarlar. Siz keçin qonaqların yanına, mən o biri otaqlara baş çəkməliyəm.
Gedir.
Hacı (onun arxasınca)
Qoca tülkü. O, qızını verdiyi adama mən itimi vermərəm.
Məşədi
Öz övladını pula, mənsəbə satır.
Hacı
Nə olsun ki, jandarmadır. Ətə qatsan, it yeməz, ota qatsan, at.
Kapitan içəri girir.
Məşədi
Yavaş, dostu gəldi.
Hacı
Kapitan, yallah, yallah...
Kapitan
Aha, burada baş-başa verib nə barədə danışırsınız?
Məşədi
Kəblə Muxtar barəsində.
Kapitan
Şübhəli adamlara oxşayırsınız. Kəblə Muxtar hökumətin nəzərində yüksək mövqedədir. Siz onun əleyhinə niyə danışırsınız?
Hacı
Əleyhinə yox, lehinə deyirik, qızı üçün deyirik, nə yaxşı adam seçib, jandarmeriyada işləyir.
Məşədi
Ay Hacı, qar qar üstə yağar da...
Kapitan
Bura baxın, Hacı, Məşədi, mən qoca qurdam... Tükü tükdən seçirəm. Padşaha xülusi-qəlb ilə xidmət eləmək lazımdır. Dünyaya hərc-mərclik salan elə sizin kimi tacirlərdir.
Məşədi
İşə düşmədik! Hərc-mərclik salanın atasına lənət, a kişi!
Hacı
Kapitan, sabah zəhmət çəkin mənim kantoruma, sizinçün bir hədiyyə hazırlamışam.
Məşədi
Mənim də kantoruma gəl, əliboş getməzsən.
Kapitan
O ayrı məsələ. Bax, bu cür, açıq danışmaq lazımdır.
Kəblə Muxtar içəri girir.
Kəblə Muxtar
A kişilər, burada niyə dayanmısınız? Kapitan, xoş gəlmisən, gözüm üstə yerin var. Buyurun, qonaqların yanına.
O biri otağa keçirlər. Bu halda Rəşid Məğrur çıxır. Tələsik getmək istədikdə Əlibaba və İmamqulu dalınca qaçıb onu saxlayırlar.
Əlibaba
Dayı, dayı, hara gedirsən?
İmamqulu
Dayan, yarımçıq qoyub getmək olmaz, qayıt geri...
Rəşid Məğrur
Qumarın zinəti puldur. Sizin cibiniz boşalıb, boşu doluya vurmağın nə mənası?
Əlibaba
Mənim pulum var, dayı, budur, bax!
Cibindən pul çıxardıb göstərir.
İmamqulu
Pul əvəzinə banka qoçu Əlabbası qoyuram.
Kitabxana.az · https://kitabxana.az/ru/works/sabit-rehman-diriler-ikinci-perde
Клавиши ← → для перехода, R — случайное стихотворение
Другие произведения автора
Səkkizinci şəkilBakının küçələrindən biri. Əlibaba ilə İmamqulu Kəblə Muxtarı gətirib güclə bir daşın üstündə oturdurlar.*
Əliqulu evlənir4 pərdə, 5 şəkildə*İştirak edənlər
Birinci pərdəBirinci şəkilPərdə qabağı. Sol tərəfdə telefon budkası, sağda ağac və skamya. Bunlar sona qədər bu cür qalır.*
İkinci pərdəİkinci şəkilYasəmən əlində bir dəstə çiçək pərdə qabağına çıxır.*
Стихи других поэтов
Zülfün kimi qaraldı könül dudi-ah ilə,Eşqində iddia edərəm bu güvah ilə.
Gəldi bir qaşı kaman yanıma göyçək-göyçəkGəldi bir qaşı kaman yanıma göyçək-göyçək,Atdı müjgan oxunu canıma göyçək-göyçək.
Barilahim qismət etmişBarilahim qismət etmişYaxşı yoldaşlan məni,
Nihani bəslənir ləlin xəyalı can arasındaNihani bəslənir ləlin xəyalı can arasında,Bəli, can riştəsi vardır, deyirlər, qan arasında.